Keteni

KETENI

Ak piläni gaýnag suwda kelepläp,
Ezber zenan ýüpek sarar ýumaklap,
Elwan reñk çöplär, çöpboýa toplap,
Dünýä indi sary ýolly keteni.

Arzuw bilen tara ýüwürder gelin-gyz,
Aýagy gozakda gyş, ýaz, tomus, güýz,
Hyjuwly pikirin üýtgetmez hergiz,
Egni goşa sary ýolly keteni.

Ýakasynda sekizgoçak nagşy bar,
Ajap saýlan siñirmäniñ nagşy zor,
Köz dek bu ketenä gören hyrydar,
Gadymýetden miras galdy, keteni.

Apbasyly köýnek boýuñ bezegi,
Şuglasyndan artar öýüñ bezegi,
Nurana gelin-gyz toýuñ bezegi,
Gözellige gark boldy, keteni.

Keteni geýeniñ ruhy bolmaz pes,
Gyzu-gelin ýagşy hyýala höwes,
Egrip dokamagy başarmaz her kes,
Aslyýeti türkmen milli keteni.

Gutarýandyr geýseñ gaşynmak derdem,
Teniñe iteşen örende birden,
Egne geýseñ gijiñ aýrylar dem-dem,
Dermanlygy ile belli keteni.

Geýse buzgunç ysly süññi päk gelin,
Ýara ýassyk edip pamyk deý golun.
Baýram Pudak aýdar sorasañ halyn,
Arşa atar zenan kalby keteni.

Baýram PUDAKOW.