Noýabr

NOÝABR

Bu şemal ýüregmi sypalap geçdi:
«Başyň galdyr, geçýän ömri duý-a bir».
Köp wagt görüşmedik dostum mysaly –
Ýene – noýabr.

Gör, sary ýapraklar owsunyp gitdi,
Pynhan syryn açjak ýaly göýä bir.
Nämçündir, ýüregim gobsunyp gitdi –
Ýene – noýabr.

Honha, gökde düzüm-düzüm durnalar
Ýazyp barýar täleýleriň dowamyn.
Ýaşaýyş nähili täsin gurnalan,
Ýene – noýabr.

Ilkinji jägildi… hüwdi sesleri…
Men sägindim, eşdip tanyş owazy.
Duşuşyklaň, aýralyklaň mesgeni –
Ýene – noýabr.

Kakamyrat REJEBOW.