20:50 Saña / goşgular | |
■ Saňa
Sen meň ak bagtymyň ajap keşdesi, Ykbalyň arzylap beren peşgeşi, Ýüregime melhem mylaýym sesiň, Meň bagtyma uzak ýaşa ylaýym. Hernä, ogul-gyza düşdi gözümiz, Şükür, dowamsyz-a galmaz yzymyz, Bile külterleýäs ömür ýazymyz, Meň bagtyma uzak ýaşa ylaýym. Öwrüm näme, synag näme, düşüş biz, Çünki durmuş gazanynda bişişdik, Aljyrasam, tekge berdiň, köşeşdim, Meň bagtyma uzak ýaşa ylaýym. Yzaly günleriň ünjüsin syryp, Mydam goltgy berdiň, kükregiň gerip, Ýalňyşman ekenim men göwün berip, Meň bagtyma uzak ýaşa ylaýym. Küde-küde meseleleň çözgüdin, Tapdyň magat bilip ugrun, gözgüsin, Çekdirmediň bu durmuşyň görgüsin, Meň bagtyma uzak ýaşa ylaýym. Şygyr ýazsam, kesä çekmän goldadyň, Ylham gelse, asmanda pelpelledim, Şonda-da sen geňlemediň, degmediň, Meň bagtyma uzak ýaşa ylaýym. ■ Sabyr-takat bezär ömri Sabra ýol ber, goý, giňesin ýüregiň, Giň bolsaň, taparsyň mydam geregiň. Kanagata uýan terse gitmez hiç, Takatsyz göwünliň işi bolar puç. Giň göwrümli bolsaň, utarsyň mydam, Ýüregi giň, garaz, tapar bir mydar. Göýä ummanlar deý mydam giň boluň, Şeýdip, bagtdan ýetdik serpaýy alyň. Kanagatly köňül paýly rysgaldan, Nesibäň güýçli bor, bolaýsaň galjaň. Ynsan ogly, bergin sabra puryja, Şonda edenleriň çykmazmyş puja. Eneleň öwüdi sabyrly bolmak, Atalaň öwüdi nebsiňi bilmek. Takata bil baglap, utulan ýokdur, Kanagatly kişiň ýüregi päkdir. Sabra orun berip ýaşaň elmydam, Sabyrlyň rysgalam bolar bol mydam. Ýaşaň ýagşylygyň dost-ýary bolup, Şonda abraýyňyz has gider galyp. Hawa, bu durmuşyň lezzeti başga, Synagy, öwrümi, hezzeti başga. Muwapyk bolalyň adam adyna, Kanagat öwrülsin göwün şadyňa. ■ Gelmegeý Gelersiň diýp, kän garaşdym ýoluňa, Geleňok sen, neçün habar almagaý. Hernä, düzüw pikir girsin päliňe, Meň ahwalym neneň, neçün bilmegeý. Wah, gün sanap tüketdim hasabymy, Bir bilsediň çekdiren azabyňy, Aňlap bilmen hoş günleň mazasyny, Degre-daşda keşbiň göze ilmegeý. Umyt diýlen duýgyň kirşi üzüldi, Didelerme niçe hünji düzüldi, Ýürek tama ede-ede ezildi, Bagryň daşmy, birje nazar salmagaý. Ýaýraw edýär aýralygyň örüsi, Ondan saplanmagyň ýokmy çäresi?! Täk özüňsiň bu ömrümiň manysy, Tamalarym harlap, reýgan kylmagaý. Gyýa-gyýa bakyşyňy ýatlaýan, Ýaş-juwanlyk ýyllaryma ätleýän, Ýürek karar tapman, sessiz datlaýar, Sensiz didäm-roýum asla gülmegeý. Her gün geleriňe umyt baglaýyp, Ham-hyýalda gezdim, göwnüm awlaýyp, Gel, köňlümiň şasy, bor ýogsa aýyp, Sensiz köňül bagt mukamyn çalmagaý. Dursun TEKÄÝEWA. | |
|
√ Rubagylar / Goşgular - 13.01.2024 |
√ Günüñ monology / Goşgular - 01.01.2024 |
√ Siziñki / Goşgular - 30.01.2024 |
√ Dostluk hakda / Goşgular - 18.02.2024 |
√ Atsyz goşgy / Goşgular - 31.01.2024 |
√ "Diýdiñ: Gelin bolup görkezeýinmi?.." / Goşgular - 14.02.2024 |
√ Şert / Goşgular - 09.02.2024 |
√ Gije hem gündiz / Goşgular - 07.02.2024 |
√ Käbir aýallara melek diýýäñiz / Goşgular - 04.02.2024 |
√ "Gelin jan..." / Goşgular - 26.03.2024 |
Teswirleriň ählisi: 0 | |