Uly agaňyz nä beýle eglendi

****

Uly agaňyz nä beýle eglendi,
Ýola bakyň diýen ejem bardy meň.
Ekizlerim, bir-birege igenmän,
Bile bakyň diýen ejem bardy meň.

Iliň derdin çeken kişi nalamaz,
Ýekemen küýlüni hiç kes halamaz,
Hergiz, hergiz, hergiz, hergiz balalam,
Ile bakyň diýen ejem bardy meň.

Bolsun ýüreklerňiz gunduz, guw ýaly,
Edilen günäni toba ýuwýamy?
Batyl böwetleri böwsüp suw ýaly,
Sile bakyň diýen ejem bardy meň.

Gaýta-gaýta nygtapdyrlar ötenler,
Ynsan ömri ýeke möwsüm ösen ýel.
Ýeri söýüp, derin döken kösenmez,
Pile bakyň diýen ejem bardy meň.

Gül ýüz köňülleriň ýagy ýalydyr,
Bal söz ýürekleriň bagy ýalydyr,
Her kim kysmatynyň bagybanydyr,
Güle bakyň diýen ejem bardy meň.

Ejizlemäň, egbarlamaň dat edip,
Gökde perwaz ruhumy şat ediň,
Ölsem, haýru-dogalarda ýat ediň,
Dine bakyň diýen ejem bardy meň.

Gurbandurdy ORAZOW

# Hijran-Halkasy 11-nji şygyr