Ýolda köp büdreýän gatyryñ düýe ýanynda zeýrenişi hakynda hekaýat

Ýolda köp büdreýän gatyryñ düýe ýanynda zeýrenişi hakynda hekaýat

Bir Gatyr zeýrendi ýanynda Düýäñ:
"Ýola çyksam häli-şindi büdreýän.

Ýöremäm hyllalla islendik ýolda,
Garaz, bolup ýörşüm gözgyny halda.

Dyzlam sypjyrylýar, ýa degýär kelläm,
Şoñ üçin kän meniñ üstümden gülýän.

Şol sebäpli halys azdy meñ gäbim,
Sen-ä büdräýeñok, aýt-da sebäbin?"

Düýe oña jogap berdi howlukman:
"Biler bolsañ, men has uzagrak bakýan.

Seniñ görýän ýeriñ sähelçe ara,
Ana, şol hem seni goýýar azara.

Men töwerek-daşa belentden garap,
Äwmän, alñasaman barýaryn ýöräp.

Hut gözüm ýok ýaly, süssürlip barman,
Çukur-oýy saýgarmagy başarýan.

Seniñ gözüñ ýetýän ýeri şeýle dar,
Diñe şol sebäpli çekýärsiñ azar.

Ýörejek ýoluñy ykjam saýgarman,
Ädim ursañ, mydam çekersiñ arman".