Aýdym

AÝDYM

Eşdilse-de şirin heňli adaja,
Ähli aýdymlaryň genjidir täji.
Sözleri akgynly hem-de sadaja,
Ýöne belentdedir oň ruhy güýji.

Ol aýdymy diňleseň-de müň ýola,
Doýman-doýman ýene diňläsiň gelýär.
Ol aýdymdan ynsan gelýär kemala,
Aýdym bütin älem içre diňlenýär.

Eneleriň ýüreginden syzylan,
Iň arzyly sowgat öz zürýadyna.
Mähir, yhlas, söýgi bilen bezelen,
«Hüwdi» diýrler ol aýdymyň adyna!

■ GÖWNÜM

Belent daglara bakyp,
Taparyn gaýrat, göwnüm.
Ýaşyl baglara bakyp,
Bolsun mydam şat göwnüm.

Goýman şu endigimi,
Söýýän eziz kendimi,
«Pederleriň pendini
Berkden tut» diýýär göwnüm.

Aýrylman ýagşy pälden,
Namysy bermän elden,
Çykmasaň ulus-ilden,
Bor ömrüň zyýat, göwnüm.

«Artyk-köpi gözlemän,
Ýalan-ýaşryk sözlemän,
Kemçiligi gizlemän,
Ýüzne aýt» diýýär göwnüm.

Dogry ýoldan gyşarsaň,
Tiz gözlerden düşersiň,
Ejizlere başarsaň
Kömek bolsun nagt, göwnüm.

Arzuwym gursakdaky,
Bolmasyn çeni-çaky.
«Eziz Diýara baky
Sežde et» diýýär göwnüm.

■ ÇOPAN GYZY

Öýden çykylmandy köpden,
Sährany küýsedi göwün.
Myhman bolduk saý-sebäpden,
Çopanyň öýüne bu gün.

Seýkin basyp, uýaljyrap,
Çal uzatdy çopan gyzy.
Mähir bilen galdym garap,
Gözelleň uzlarnyň uzy.

Eda bilen girip-çykyp,
Çekip ýör öýüň keşgini.
Sadalyk gülüni ekip,
Bezeýär köňül köşgüni.

Bark urup dur sagy-soly,
Gezim edýän assa-assa.
Çopan gyznyň göwni ýaly,
Türkmen sährasy arassa...

■ SÄHRA

Sährama seýle çykdym,
Tämiz howasy derman.
Çar ýana doýman bakdym,
Belendi-pesi derman.

Uzap gidýän ýollary,
At gaýtarym gollary,
Süri-süri mallary,
Tüýdügiň sesi derman.

Tilki, towşan, käkilik...
Çar tarapym täsinlik,
Ýüz müň dürli ösümlik,
Hersiniň ysy derman.

Elwan-elwan säheri,
Arşa atarýar seri,
Şapagy — tylla zeri,
Nurdan sapasy derman.

Göýä, şaýly gözeller,
Ak şelpeli sözenler.
Ýylpyldaşýan köz olar,
Her bir teňňesi derman.

Gije howa seleňdi,
Argyn süňňüm ýeňledi,
Şemal täsin hiňlendi,
Şirin hüwdüsi derman.

Bol hazynaly humuň,
Syrdaşym hem hemdemim,
Dostlar, gözel sähramyň
Kerem dünýäsi derman.

Amanmyrat MAÝEW,
Türkmenistanyñ at gazanan žurnalisti.