LOURENS BLOK Lourens Blok (iňlisçe: Lawrence Block), 1938-nji ýylyň 24-nji iýunynda ABŞ-nyň Nýu-Ýork ştatynyň Buffalo şäherinde doglan, amerikan ýazyjysydyr. Ol esasan detektiw žanrynda eserleri ýazýar. Onuň iň meşhur romanlary öňki polisiýa işgäri Metýu Skadder bilen asylzada-ogry Berni Rodenbarr hakdadyr. 1994-nji ýylda L.Blok ABŞ-nyň detektiw we jenaýatçylyk romanlary žanrynda ýazýan awtorlaryň guramasynyň (Mystery Writers of America) Baş Ussady (Grand-Masteri) diýlip ykrar edilipdir. L.Blog 1950-nji ýyllarda ýazan eserlerini, ol tahallus (edebi lakam, psewdonim) bilen neşir etdirip, olar esasan erotiki häsiýetli bolupdyr. Onuň ilkinji çap edilen detektiw eseri 1957-nji ýylda “Manhunt” atly detektiw-başdan geçirmeler žurnalynda onuň öz ady bilen “Siz utulyp bilmersiňiz” atly hekaýadyr. Şondan bärem L.Blok 50-den gowrak detektiw romanlaryny we 100-den köp şu žanrdaky hekaýalary çap etdirdi. Häzirki wagtda L.Blok Nýu-Ýorkda ýaşaýar, onuň aýaly Linn Blok, öňki aýaly Alison Poulet bilen nikasyndan üç sany gyzy bar. Ol öz aýaly bilen işinden boş wagtlary esasan syýahat edýär. Olar şu wagta çenli 135 ýurtda bolup görüpdirler.
Öz ýatlamalaryna görä, 12 ýaşynda ýazyp başlapdyr. Ilkinji eserlerini neşirlere eltende ýaşynyň kiçidigi sebäpli almandyrlar. Soň "Lesli Emerson" we ş.m. tahalluslar bilen ýazmaga başlapdyr. Özüniň ýazyjylyk bilen gazanç edip bilýändigini subut etmek üçin, ýuwanjak, suwjuk, yşkbaz-jynsy mazmunlyja her aýda bir roman, her ýylda bolsa azyndan 15-20 roman ýazyp, neşir etdirer ekeni. Şeýle sýužetli ilkinji romanlaryndanam 1000 dollar galamhaky gazanypdyr. Neşirýatlaryň esasy talabam awtoryň ýazan zadyny çapa taýýarlamak üçin goşmaça artykmaç zähmet zerur bolmaly däl eken (teksti gaýtadan ilik-düwme okap düzetmek, syntgylamak, çeperçiligini :-) bolşuna görä baýlaşdyrmak we ş.m.). L.Blok şu talaplara eýgerjek bolup, soň şeýlebir gowy ýazmaga başlapdyr welin, hut hoşuňyza geläýsin (Ine jana şypa pul, gazanç höwesi nähili gudrat görkezip bilýä! :-)). Ol ilkinji çynlakaý romanynam 1961-nji ýylda, 23 ýaşynda çap etdiripdir - "Kezzabyň oýny". "Öwrenilen endik örkleseňem durmaz" diýleni, bu romanam L.Blok öňküleriniň äheňinde başlapdyr. Emma soňabaka ol detektiw ýorduma ýazyp gidipdir. Roman çap edilenden soň birneme ünsi çekipdir. Şol hem L.Blogyň yşkybaz suwjuklygy köke bişiren ýaly bişirip ýatmakdan el çekip, detektiw eserleri ýazmaga ýüz urmagyna getiripdir. Netijede 1976-njy ýylda onuň Metýu Skaddar hakyndaky birinji romany "Atalaryň günäleri" peýda bolýar. Şol hem L.Blogyň şöhratynyň hem-de millionlyk galamhaklarynyň başlangyjy bolupdyr.
0
