Mäti Kösäýewiñ goşgulary

MÄTI KÖSÄÝEWIÑ GOŞGULARY

▶ ILLERE SALAM

Mähriban Watanym ~ Türkmenistana,
Görogly öwlady illere salam.
Näz-u-kereşmeli, gezip mestana,
Gara gözli, inçe billere salam.

Ýurdunda köp bolar gyzyl-lälesi,
Açyk desterhanly türkmen balasy,
Mekirligi bilmez, ýokdur alasy,
Köñül awlan sada dillere salam.

Dag, deñiz şemaly mylaýym kakan,
Ýaýlasynda düýe, goýun, mal bakan,
"Waharman", "terbaşlar"... ýene bal akan,
Säher Hydyr gören çöllere salam.

Babasy döwletli, söýünhan ili,
"Ýör-he-ýör!" bolanda berk guşar bili,
Köp hasyl öndürer kätmeni, pili,
Näz-u-nygmar atyz, çillere salam.

Hanazat baýtallar, gyl boýun mallar,
Dürli janawerden doludyr go:llar,
Asudalyk söýen, rahat iller,
Aýally, aýalsyz, dullara salam.

Ýigitleriñ Watan çykmaz ýadyndan,
Ýürek ýanar aýralygyñ odundan,
Bu ýerdäki türkmenleriñ adyndan,
Aýal, oglan-uşak, çallara salam.

1954.

▶ GÜLLER BILEN
(Magtymgula)

"Magtymguly - wagtyñ guly",
Saýrap şirin diller bilen.
Ulus iliñ çyn bilbili,
Höwes edip güller bilen.

Il-halkyny çyndan söýdi,
Duşmanlaryñ gözün oýdy,
Ebedilik miras goýdy,
Ökde, çeper eller bilen.

Eser ýazdy şirin-şirin,
Dessan düzdi şirin-şirin,
Şerbet ezdi şirin-şirin,
Mäjum edip ballar bilen.

Ilde bolan hemme söze,
Belet boldy geze-geze,
Seýran edil dag-u-düze,
Deñiz, derýa, çöller bilen.

Oragyny alyp ele,
Söz manysyn bile-bile,
Kuwwat berip çeper dile,
Öñe gitdi iller bilen.

1958.

▶ ÇAGYRYŞ

Uçuñ, guşlar, uçuñ, guşlar,
Uçmak üçin ýollar azat.
Guw hem gazlar, ýaşylbaşlar,
Deñiz, derýa, köller azat.

Garaguma görk berenler,
Sährada erkin ýörenler,
Çaýlar, oýlar, gollar azat,
Çöl bezegi - ak jerenler.

Durna geler hatar-hatar,
Erkin uçuñ, ýokdur hatar.
Saýýatlardan, gulatydan,
Gel-de, bize başyñ gutar.

Ebedilik ýazlar bizde,
Söhbet bilen sazlar bizde,
Mähribandyr biziñ iller,
Söýgi hem-de näzler bizde.

1962.

▶ TALYP GYZA

Owazyñ artykmaç saýrak bilbilden,
Bäs edip mukama, çeşme-bulaga.
Nepisdir ýüzleriñ gyrmyzy gülden,
Sözüñ sazdan ýakymlydyr gulaga.

Güleñde çar tarap döner bahara,
Degişmek, sadalyk saña ýaraşýar.
Orun ýok kalbyñda gaýgy-gahara,
Şanly durmuşymyz saña garaşar.

Edebiñ mynasyp türkmen gyzyna,
Il haýran, çöl gyzy, ynam-erkiñe.
Sesiñ meñzär Mylly aganyñ sazyna,
Edebiñ mynasup syrat-görküñe.

1968.

▶ SÖZLÄR SÖZÜNI

Belet başlar dogry ýoly çen bile,
Akyl adam söz başlamaz "men" bile.
Magtymguly.

Akyllylar başar özün alyp bermegi,
Eýlemez ol elek-çelek gözüni.
Sözleşende çommaltmasyn barmagy,
Oýlanşykly, bilip sözlär sözüni.

Ýagşy ýigit söz başlamaz "men" bilen,
Adamlara habar gatmaz "sen" bilen,
Köpçülikde gürrüñ etmez çen bilen,
Salyhatly alyp barar özüni.

Her bir ýerde dogry bilip ornuny,
"Men-men!" diýip, ýele tutmaz burnuny,
Kinaýaly ýyrşartmaz ernini,
Iş buýranda artdyrmasyn "näzini".

"Köp bilýän" diýp ulumsylyk etmesin,
Gybat bile "myş-myşlara" gitmesin,
Ýalan bilen çyny garyp-gatmasyn,
Mahlasy, bilmeli çaljak sazyñy.

1973.

▶ SAÝRA, BILBIL!

Hoş gelipsiñ bagymyza,
Saýra, bilbil, saýra, bilbil!
Şatlan ajap çagymyza,
Saýra, bilbil, saýra, bilbil!

Saýra bahar ~ ýazlar hakda,
Kereşmeli näzler hakda,
Ýigitler hem gyzlar hakda,
Saýra, bilbil, saýra, bilbil!

Hoş owazly sazlar hakda,
Ördek, guba gazlar hakda,
Bu şadyýan ýüzler hakda,
Saýra, bilbil, saýra, bilbil!

Ebedilik bagym hakda,
Dür-magdanly dagym hakda,
Azat durmuş çagym hakda,
Saýra, bilbil, saýra, bilbil!

1973.