Musa Jelile

MUSA JELILE 

Eger öňde-soňda
hakyky şahyr
kim? — diýseler, adyň tutardym welin,
Sen şeýle ýönekeý
Hem kiçigöwün, —
Bilýän, öwgim saňa ýaramaz, Jelil.
Her näme-de bolsa,
seni soraglap,
Ýüregim kükregme urdy müň gezek.
Jelil,
Bu hak sözüm, —
sen beýik adam,
Maňa seniň bilen gürleşmek gerek.

Ine, ähli jübim goşgudan doly,
Alyp geldim baryn seniň suduňa
Oňat bilýän,
ýylylyk az olarda,
Çünki men ýanmadym ýanan oduňa.

Goý, ol şu gün bolsun, ýa bolsun erte,
Eger il göwnüne ýakmasa şygyr,
Mende
Seni beýik eden duýgynyň
Müňden bir bölegniň bolmadygydyr.

Seniň beýikligiň sebäbi näme?
Neçün ajal senden gelipdir ejiz?
Çünki sen diňe bir goşgular ýazman,
Ýazylan goşgyny goradyň, Jelil!

Eger dünýäň bar şahyry jem bolsa,
Sarsdyrdy sesleri ümmülmez Ýeri.
Ýöne içlerinde Ajalyň gözne
Bakyp, goşgy ýazjak känmikä beri?!

Maňa
Seniň bilen gürleşmek gerek,
Dökmek gerek
ýüregimiň posuny
Şahyrlar
bireýýäm rowaýat bordy,
Seniň kimin goran bolsa postuny.

Ýürek ýeke zatdan teselli tapýar:
Eger sen ruhumda ýaşasaň,
Hergiz
Seň geçen ýoluňy, pikire batman,
Gysgaltman geçmäge taýyn men, Jelil.

Eger mümkin bolsa,
Ýaryp kükregmi,
Ýüregmi gursagňa salardym bada.
Çünki,
Ýazmak üçin iki adam hakly
bolsa, birinjisi sensiň düňýäde…

Gurbannazar EZIZOW.