"PERIŞDELI" GIJE
- Biotok diýeniñde bir zat ýadyma düşdi.
- Ýeri bakaly...
- Ýadyñdadyr. Bir döwür bolandyr, on-on bäş ýyllykda. Şeýle bir elleri biotokly köpelendir welin, hatda şolar bilen elleşäýseñ dagyn, edil 220 woltluk togy elläne dönäýýäñ diýerdiler. Serreldäýýärmişin. Onsoñ öz aýalyñ elini ellemäge-de ýaýdanyp duransyñ.
- Hawa-aý, şeýl-ä bolupdy.
- Ana, şol günleriñ birinde olaryñ biri biziñ obamyza-da geljekmiş diýen gürrüñ ýaýrady. Aý, ýok, gürrüñem däl, hakyt gapylaryña çenli bildiriş ýelmäp çykdylar. Güýçlüsi bolmaga çemeli, gelmeziñden öñürti "dow-dowy" ýetdi oñ, derdiñ bolsa, biotogu bilen güm edäýýärmiş.
- Ýeri, onsoñ?!
- Onsoñy şol. Şeýle bolansoñ, ony obanyñ sport meýdançasynda garşylamak karara gelindi. Sporta gatnaýan oglanlara meýdançanyñ ot-çöpüni çapdyrdylar, arassalatdylar. Hatda päsgel bermesin diýip, meýdançanyñ iki çetindäki garalyp duran demir derwezeleri hem goparyp zyñdylar.
- Beh...
- Behiñ has ulusy heniz öñde, gardaş. Ine, bellenilen günem gelip ýetdi. Öýleden soñ hemmäniñ ýüzi obañ çetine tarap. Geçen hepde togsan ýaşyny bellän Akja mama näme diýersiñ, agtygynyñ at arabasyna aslyşyp, şolam ilden öñde-how. Garasaý, sport meýdançasy öñde-soñda görmedigini gördi-dä. Munça adama aýlanyp, çykjak bolsa, Taññy petekçiñem dat gününe.
- Ýygnananlaryñ ählisi dertlimikä?
- Elbetde, galyñ görgüliniñ hersiniñ özüne ýetik derdi bardyr-da. Ýöne sen azrak sowal ber-de, köpräk diñle!
- Bolýar, bolýa.
- Hawa, geljek myhmana köp garaşmaly bolmadyk. Gün ýañy aşak sallanyp ugran uçurlary, nätanyş maşyn gelip, ýörite niýetlenen aýmançada saklandy. Oba adamlary ony "geldi-de-geldi" bolşup garşy aldylar.
Bizem bir üýtgeşik adam görjek. Maşyndan düşen ak eginbaşly aýalyñ obamyzyñkylardan tapawutky ýeri ýok eken-le.
Myhman ulagdan düşüşine ýygnanan mähellä birlaý göz aýlady. Soñra bolsa, obamyzyñ medeniýet boýunça orunbasary Amanja Taganowa bilen tirkeşip öñe çykdylar. Ilkinji söze Amanja Taganowa başlady. Ol myhmanyñ dogulyşyndan başlap, tä ýañyja gelip, maşyndan düşen wagtyna çenli geçen ömür ýoluny gürrüñ berdi. Ondan peýda tapan näsaglaryñ ummasyzdygyny nygtady. Şol bejerilen adamlaryñ arasynda birlän-ikilän ajaly ýetip, pany bilen hoşlaşany bolaýmasa, galanynyñ sag-aman gymyldaşyp ýörendigini dabara bilen belläp geçdi. Umuman, ony dadymyza hut wagtynda ýetişen perişdä çenli meñzedip goýdy. Tanyşlyk pursady tamamlanandan soñ "Perişde" myhman işe başlady:
- Hemmäñiz maña üns beriñ! Barmaklaryñyzy bir-biriniñ arasyndan geçiriñ. Soñra ýokary göteriñ we kelläñiziñ arkasyna geçiriñ!
Aýdylany etdik.
- Gözleriñizi ýumuñ! Üns beriñ! Gözleriñize nämeler görünýär?
Gepi uzaldyp nädeýin, garasaý, ol bize bir sagatlap bejergi geçdi. Has aýgytlysy heniz öñde bolsa nätjek. Iñ soñunda ol bize tabşyrdy:
- Indi öýli-öýleriñize gaýdyñ-da, irgözinden düşege geçiñ. Ýöne, üns beriñ! Ýatjak otagyñyzda özüñizden özge kişi ýatmasyn. Penjiräñiz we gapylaryñyz açyk bolsun! Ýene-de üns beriñ! Ýatanyñyzda gowy-gowy dilegler edip ýatyñ. Ýöne uklamak bolmaýar. Gijäniñ belli bir wagtynda biziñ kömekçilerimiz siziñ ýatan otagyñyza bararlar we derdiñize em ederler. Dilegleriñiz-de hasyl bolar. Ýöne gorkmaly dãl. Ol barjaklar dürli hili janly-jandaryñ ýa ynsanyñ sypatynda bararlar.
Kimiñ bejergini gap bilinden döwesi gelýär?! Eñdik öýli-öýümize. Men-ä gele-gelmäne hasyr-husyr işe girişdim. Agşamlygymy-da çalak-çulak edinip, ýerime geçdim. Gelse gelibersin, nähili perişde bolsa-da, men taýýar! Bolup ýörşüme öýdäkiler gülen bolýarlar. Gülübersinler. Etjek arzuwlarym hasyl bolanda, üstümden gülendikleri üçin utanarlar.
Ýöne gelmeli perişde hiç gelibermedi. Onda-da özüme göwünlik berýän. Obanyñ hemme öýüne aýlanyp çykjak bolsa, olara-da wagt gerek. Ýöne dañ atmanka maña-da gelip ýetişäýseler.
Ine, birdenkä gapyda bir gara gözüme kaklyşan ýaly boldy. Oh-ho-o, geldi öýdýän. Gelibersin bakaly. Dogrudanam, ýalñyşman ekenim. Bir seretsem, gapydan biri egreljiräp girip gelýär. Ýöne näme üçindir ol gapynyñ iç ýüzünde aýak çekdi.
- Aman, Aman, ýatdyñmy?
"Beh, bu nähili beýle bolýar-aý?! Eşidilýän ses aýalymyñka meñzeş-le. Asyl, sypaty hem şonuñky. Wah, geljek bolsañ başgarak görnüş tapmadyñmy diýsene. Öñem-ä... Onsoñam, ol geljek peri adyñy tutup, zowladyp durar diýmändi ahyryn. Ýatybereýin hany, soñy neneñsi bolarka?!"
Gapyda garalyp duran gara ýene-de adymy tutup, birki ýola gygyrdy. Menem "hä" bermän ýatyryn. Hyk-çok edip çykyp gitdi.
Gidensoñ, galdym bir derde. Beh, ýañky gelen, dogrudanam, gelmeli perişde bolaýmasyn?!
Ahmyr edip ýatyşyma ýene-de esli uklapdyryn. Ine, birdenkä gapyda ýene-de hälki gara peýda boldy. Ýöne bu gezekki gelşi gaty haýbatlydy. Ol göni gelip, gapdalymda çökdi.
- Aman, men saña diýýän! Meni äkitjekmi ýa göbegenäni goñşulardan gözläýinmi?
Ýerimden zöwwe galypdyryn. Hakykatdanam, gapdalymda gözlerini ýaşlap, buruljyrap oturan öz gelnim. Oñ bu gün-erte köpelmelidigi hakydama şol wagt gelýär. Bar zady taşlap eñsik bäbekhana. Hernä wagtynda baraýypdyrys. Bolmasa-ha... Yzymda näçe perişdäniñ geleninden habarym ýok. Ýöne daña golaýa gyzymyz boldy. Ynha, halypa, meniñ-ä perişdeli kyssam şu.
Öwezgeldi ORAZGYLYJOW.
0
