Umuman..

Berdinazar Hudaýnazarow

▶ UMUMAN...

Belli bir adamyň adyny tutman,
Bellibir meseläň başyny çatman,
Bellibir nyşana çenemän-atman,
Gürledi umuman,
Gezdi umuman.

Saýlaman durmuşda anyk bir ugry,
Hiç zada çynlakaý ýakmady bagry.
Ne-hä dogry diýip,
Ne-de nädogry,
Işledi umuman,
Iýdi umuman.

Berilýän sylagmy,
jezamy ýa-da –
Parhy ýokdyr – ony makullar bada.
Muny ömür boýy edinip kada,
Ýylgyrdy umuman,
Güldi umuman.

Aňzakda üşemän, jöwzada ýanman,
Ne-hä bir ynanyp,
Ne-de ynanman,
Öz ömründe öz kellesin ulanman,
Ýaşady umuman,
Öldi... umuman.