22:20 Ahwal | |
AHWAL
Näme üçindir hyýalymdan gideňok, Şol ýylgyrşyň göz öňümde dur entek. Ýanyňda ýaňra dil diýen edenok, Düýbünden lal-a däl, bolupdyr peltek. Gijemi gündizmi gaýmy tupanmy, Ähli zat bulaşdy, düşnüksiz älem. Meniň bu dünýäde seni tapanmy, Kalbymdaky surat ýatladýar hälem. Men bolsa awara seniň ugruňda, Bu barlyga, barlygyňda garaýan. Nämüçindir haýran bolup durunla, Bar bolany, ýüregime ýaraýan. * * * Men nämüçin ýene saňa garaşýan, Umydymy üzdüm etdim ahbetin. Çyn söýgi düşnüksiz ahwal ekeni, Garaşmagam, garaşmazlygam çetin. Gezip ýörün baş öwredip erkime, Duýgularyň bolsa egenok başyn. Men seni unutjak bolýan sen bolsa, Meniň bütin dünýäm, töwerek daşym. Wagtyň kenaryna urunýar günler, Ýyllarym-daşgyny, ömrüm gaýtgyny, Ýene şol aýdymyň gaýtala, dünýäm, Ony saňa meň ýüregim aýtdymy. Men nämüçin ýene saňa garaşýan, Sen üçin indimmi ýagty jahana?! Eger şeýle bolsa Senem tersine Inipsiň gitmegme bolup bahana. * * * Gülläninde arzuwlary käbämiň, Üçünji perzendin bagryna basan. Labzyn söýen bir aýdymçy gyzynyň, Şirin hem gül adyň boýnumdan asan. Indi menem süýjüligiň ugrunda, Razy şirin şygyr goýsam yzyma, Razy, Iň bolmanda, ýekeje kişi Nusga diýip adym daksa gyzyna. * * * Maňa seni söýýän diýäý, Bir az hasratym egsiler. Nämüçin, seni küýseýän, Çala göwnüme degseler. Öňküler deý gözme bakyp, Halymy sora, söýgüle. Menem saňa eräp-akyp, Şygyr ýazaýyn duýguly. Aýdyşyp täze degişme, Unudaly gussaň baryň, Bize tukatlyk gelişmez Gülüşeli söwer ýarym. ◾SAŇA JOGAP Meni myhman almadyk öý, Küýsediňmi söhbedimi?! Goşgulamda gördüňmi ýa Ýanan söýgiň şöhlesini?! Düşünmedim sowalyňa, Şygrym jogap dälmi saňa?! Synan ykbal zowalyna Ömrüm jogap dälmi saňa?! Menden başga näme gerek, Başym ýoluna gurbanka?! Şygyr döretjek şanyňa Ýürekde urgy durýança. * * * Men erkin guşjagaz, ýüregiň bilen Uçup ýörün ylham diýen ganatda. Birje habar ýollaň ýüregňiz gyssa, Şygrym bilen bararyn şol halatda. Men akja kebelek hoşroý gülleriň, Jemalyna muşdaklaryň biri men. Derdiňizi alyp ýeňledip bilsem, Size ýükçi bolubilsem diri men. Men sada goşguçy goja dünýäde, Galaktika ýaly uly ýürekli. Meni tanaýanlar, tanamaýanlar. Baryň ýüregimde, maňa gerekli. | |
|
√ Победителям / Goşgular - 29.02.2024 |
√ Ýolbars we Möjek / basnýa / Goşgular - 05.01.2024 |
√ Puluň başarnygy barada agymtyl goşgy / Goşgular - 10.01.2024 |
√ Soltan / Goşgular - 27.03.2024 |
√ At galar / Goşgular - 11.02.2024 |
√ Nar / Goşgular - 22.04.2024 |
√ Жизнь / Goşgular - 29.02.2024 |
√ Salam, Türkmenistan! / Goşgular - 01.01.2024 |
√ Was-wasylara... / Goşgular - 23.01.2024 |
√ Kyrk ýaşa ýüzlenme / Goşgular - 03.02.2024 |