"Ne-hä bir eýeli, ne-de eýesiz..."

"NE-HÄ BIR EÝELI, NE-DE EÝESIZ..."

Ne-hä bir eýeli, ne-de eýesiz,
Men bir gapy kysmy sütün-söýesiz,
Öňde-soňda geler bolsa söýesiň,
Ýaşlygy duşuňdan ötürme ömrüm!

Iliň söýgüsini götäre güýç ber,
Dilegmiň hasylyn ir ýa-da giç ber,
Imanly soňlanjak haýyrly ýaş ber,
Pälimiň pesligin gidirme ömrüm!

Galam aldym, çykdym ala meýdana,
Abraýymdan galkan ýasap peýkama,
Döndüreňsoň şirin dilli şeýdaňa,
Ylhamyň joşgunyn ýatyrma ömrüm!

Göwne görä bergin ýakyn-ýadymy,
Ýürekdeş ber diňlemäge dadymy,
Nirde bolsa aklap biljek adymy,
Dostlaryň haklygyn ýitirme ömrüm!

Gözde ýaşym ak-aka sil boldy,
Giňlik beren şu garagöz il boldy,
Goşgularym ýüreklere ýol boldy,
Gussany golaýňa getirme ömrüm!

12.06.2022 ý.