Bagyşla diýmäge derek

BAGYŞLA DIÝMÄGE DEREK

Yşk ýüpüni üzäýjekmi,
Ýürekden söýmäge derek?!
Aýralyga dözäýjekmi,
«Bagyşla» diýmäge derek?!

Ejiz başym salyp görgä,
Uçup gidäýjekmi gaýra?!
Meňzeýip güýzdäki durna,
Ýazlara uýmaga derek.

Eýläp bagrym dilim-dilim,
Soldurjakmy söýgi gülün?!
Gazaply aňzak gyş deýin,
Gün kimin çoýmaga derek.

Ýakyp ýörjekmi sen oda,
Yşkda-da bar ahyr kada,
Öwrüljekmi ýedi ýada,
Ýakynyň saýmaga derek?!

Seret, ýalňyzlykda galdym,
Şygrymda bezärdim adyň,
Aldyň ylhamymyň badyn,
Setirim ýaýmaga derek.

Pikir etme, alman arym,
Diňe bagtyňy dilärin,
Çekdirdiň aýralyk zaryn,
Ugrumda köýmäge derek.

Ökünersiň aýrylanňa,
Gideniňe gaýralygna,
Gol berenňe aýralyga,
Daşymda gaýmaga derek.

Altyngözel AMANMÄMMEDOWA.