Bentler

BENTLER

Diýdiler ylymda jady bar, güýç bar,
Körzehin bolsa halk, döwletem dargar.
Bilim ulgamynda giň ýoly açyp,
Döwletin gülleder adyl hökümdar.

* * *

- Agzap älem içre ýogy hem bary,
Ýazmandyr-da bir rubagy, Pyragy?!
- Şeýledir düşmeseň, düşünseň weli,
Oň her bendi, her setirem rubagy!

* * *

Duzak kändir hergiz äge tut özüň,
Ejize, mätäje açyk tut ýüzüň.
Hormatlanan, myhman bolan ýeriňde,
Sakla el-aýagyň, diliň hem gözüň.

* * *

Tapylar ýamandan az-kem gowulyk,
Köstsiz bolup bilmez iň ýagşylar-da.
Perişde däldigi üçin adamzat,
Ýalňyşman bilmezler padyşalar-da.

* * *

Medet bersin, her kes özün eklesin,
Mert namarda ýüz saraldyp, bakmasyn.
Ýaman zatdyr, özüňçe ýok nadana,
Tabyn bolmaklykdan Hudaý saklasyn.

* * *

Ogul bardyr, saňa abraý getirer,
Ogul bardyr, abraýyňy ýitirer.
Gyz bardyr, ýamaly ýeriňi ýapar.
Gyz hem bar, ykbaly ýandyrar, ýakar.

* * *

Öz aýbyny aňmaz bir namart kişi,
Görenne at dakar, eder käýişi.
Özün pespäl tutmak merde mahsusdyr,
Gowulykdyr eden, etjek her işi.

* * *

Bäş barmagym deň etmedik Biribar,
Senden ýene möhüm bir dilegim bar.
Öz başyn çarasyn ejiz barmagym,
Güýçlüsine mätäç etmeseň bolýar.

* * *

Barabar gelmeýän ýürekler- göwrä,
Goýýar köp halatda akly haýrana.
Ejiziň ýüregem ejiz bolanda,
Özün oda urarmydy perwana?!

Geldimyrat SEÝIDOW.