Daglar

Berdinazar HUDAÝNAZAROW

▶ DAGLAR

Düşegiň ýer bolsa, üçegiň Asman,
Diwary daşlardan örülen daglar.
Gaý-tupana başyn egmän, sarsman
Kerem-keramata öwrülen daglar.

Göwsi doly ýol-ýodadan, öwrümden,
Atylan ok geçip bilmez böwrüňden.
Gyşyň gazabyndan, günüň howrundan
Saçy ak, sagrysy çalaran daglar.

Jülgeleri bardyr bakjaly-barly,
Etegi ýagyşly, depesi garly.
Heran-haçan görseň başy humarly,
Gerşinde bulutlar düýrügen daglar.

Gatlaklary gatlaklara dyrmaşan,
Çal dumany gowaklara ornaşan,
Deresinde aç-arslanlar arlaşan
Başy asman bilen birigen daglar.

Gün düşende jülgeleriň dübüne
Arkan ýat-da bir azajyk meýmire.
Ýüzläp derde melhem bolan mumyýa
Gözünden ýaş bolup syrygan daglar.

Agyr uka batan derelerinde
Gyşyň gara güýji oýananynda.
Güne ýanan ýylçyr gaýalarynda
Nije ýowuz ýeller sygyran daglar.

Haka sygnyp ýola düşseň ir bilen,
Sataşarsyň gaplaň bilen, şir bilen.
At başyny çekip, howatyr bilen
Çola zawlaryna girilen daglar.

Gözel jülgeleriň lezzeti bilen,
Gerimi, göwrümi, gudraty bilen.
Howalasy bilen, haýbaty bilen
Bizi belentlige çagyran daglar.