Dileg

DILEG

Säher çagynda dünýäniň
Namalarymdan aýyrma.
Kitap manydyr diýýänim
Danalarymdan aýyrma.

(Ýürek, bilýän, öňem bar sen),
Deňi-duşy, dosty-ýardan,
Balam diýip saçy gar deý
Agaranymdan aýyrma.

Bar umydym – toý-tomaşam,
Arzuwlary goşa-goşa,
Gözmonjugy ýaly goşa
Balalarymdan aýyrma.

Ýüregim il aýasynda,
Dilegim il barasynda,
Il-günümiň arasynda,
Agalarymdan aýyrma.

Sazagy mert, güli üşek,
Hydyr ataň demi düşen,
Dünýäde iň ýumşak düşek
Ak alaňymdan aýyrma.

Gurbandurdy ORAZOW