Dünýäniñ iñ gözel ýeri hakynda hekaýat

DÜNÝÄNIŇ IŇ GÖZEL ÝERI HAKYNDA HEKAÝAT

Görjek bolýan ýaly jadyly düýşi,
Ýaşlygyndan arzuw eden bir kişi.

Elmydam besläpdir ol ýüreginde,
Ýaşamaklyk dünýäň gözel ýerinde.

Agtaryp gözelden-gözel ýerleri,
Kän gezipdir saçyp maňlaýdan deri.

Iň gözel ýerleri tapypdyr ol kän,
Agzyn açyp oňa galypdyr haýran.

Görüp Täçmahaly, ençe baglary,
Şaglawuk, giň sähra, belent daglary.

Aradan geçipdir kän-kän aý-ýyllar,
Kän gezek açylyp solupdyr güller.

Ýürek gysyp misli aýagna duzak,
Hiç haýsynda ýaşap bilmändir uzak.

Aýlanyp-aýlanyp surnugan pahyr,
Öýüne dolanyp gelipdir ahyr.

«Iň gözel ýerini tapdyňmy gözläp?»,
Sorapdyrlar ýerli-ýerlerden sözläp.

Ol kişi gürläpdir dil açyp kem-kem,
«Iň gözel ýer ata Watanym eken!»

Aýdyň sizem gözel ýeri sorana,
«Iň gözel ýer Watanydyr ynsana».

Eziz YKBAL.