Gar ýagýar

GAR ÝAGÝAR

Gar ýagýar, nur ýagýar ene topraga,
Täze ýylyň täze rysgaly ýagýar.
Bir aklyk bar bolsa ýeriň ýüzünde,
Şolaryň barynyň nusgasy ýagýar.

Gyşky ukusyna çümen tebigat
Ýapdy bu gün ak çäkmenin egnine.
Diňe ýaşyl arça sülmüräp otyr,
Çalym edip ak öýmeli geline.

Hanha ak öýmeli gelinler bolsa,
Arça ýaly syrdam ýarlary bilen
Garly günde bir ýere-hä çykypdyr,
Nirä barýanlaryn özleri biler.

Gar syraýar,
Onuň üçin parhy ýok,
Gelinmiň sen,
Ýigitmiň sen,
Başgamyň,
Kim bolsaňam gömýär seni aklyga.

…Synlap näme diýjegimi bilemok,
Agarşyny juwan ýaşly başlaryň.