Gözleg

GÖZLEG

Ala gözli, ak maralym, nirde sen?!

Ata Atajanow.

Umyt derýam dünýe içre aýlanyp,
Towlanyp-towlanyp akyp gidermi?!
Dünýäm, aramyza düşen aýralyk
Baky aýralyga sapyp gidermi?!

Goýup ýüregiňi oduň içinde,
Meni birje gezek ýada saldyňmy?
Uzak ilde, ýedi ýadyň içinde
Serwi agaçnyň güli ýaly solduňmy?

Ýaşlyk geçdi aýasynda günleriň,
Öwrülip durupdyr pelek aýlarda.
Elwan ýaglyk, serwi kamat dilberim,
Nirede sen, haýsy jelegaýlarda?

Aýt sen, haýsy künjeginde dünýäniň,
Aýt, seni kimden alaýyn salgy?!
Bilýärmiň, güleňde dünýe gülýändir,
Bilýärmiň, aglaňda galarsyň ýalňyz.

Kämil söýgiň çyrag bolsun ömrüňe,
Ýüregiň didäňden aksa elenip,
Boýun bolma, boýun burma emrine
Hasratlar adasy – gahba pelegiň.

Diý, haýsy sähranyň benewşesi sen,
Diý, haýsy ummanyň düýbünde göwher.
Arzuwlarym saňa ymtylýar her dem,
Yhlaslarym ähli tümleri böwser.

Haçana çen ýalňyz ýaşap ýörmeli,
Haçana çen gögi naladar nalam.
Nirede sen, heniz hiç hem görmedik,
Indem ömürbaky görmejek läläm.

Gurbandurdy ORAZOW