Günäsiz gyzjagaz

GÜNÄSIZ GYZJAGAZ

Liwanyň köçeleriniň biri okkupantlar tarapyndan bombalanan wagty goşa garaçygyndan mahrum bolan arap gyzjagazy Mawiýa bilen söhbet

- Aýtsana, jigim, näm üçin Feýruz
Öňküleri ýaly aýdym aýdanok?
- Feýruzyny diňläp bilenok Beýrut,
Onuň sesin bogýar şuwlap gaýdan ok.

- Uýajygym, köp külpetli külbede,
Dynman aglaýar-la gyzlar, ejeler?!
- Feýruzyň sesini bogýan gülleden
Ölýär bärde ulular hem kiçiler.

- Aýtsana mähribanym, Mawiýa,
Gözjagazlaň garadymy, mawy ýa?
- Mawudy ol, asman ýaly mawudy...
Görüpdim, ölensoň, zaryn ses bile
Ýapypdylar ejem janyň üstüne,
Meň gözüm dek mawudy.
Ol juda juwandy, ýokdy keseli,
Onuň ömrün kesdi şuwlap gelen ok.
- Aýt, jigim, näm üçin atdylar seni?
- Bilemok.