08:27 Güýz bilen | |
GÜÝZ BILEN
Ynha, bu gün geçip barýan güýz bilen Ýalňyz galyp syrdaş bolasym geldi. Täleýine kaýyl bolup ýüz beren, Ýapraklary synlap durasym geldi. Şapagyny ýaýyp, örende ak daň, Säheriň salamyn äleme buşlan — Uçuşyny synlap ötegçi guşlaň, Nota salyp, bir saz çalasym geldi. Her ädimde hyýallarymdan düşmän, Ýapraklaň ýüzüne monjuk deý düşlän, Damjalary birje sapaga düzläp, Boýnuma monjuk deý dakasym geldi. Diň salyp ýapraklaň şyggyldysyna, Melul bolup güýz ýagşynyň ysyna, Düşüp munda ylhamymyň yzyna, Şeýdip täze şygyr ýazasym geldi. • Täleý Dagyň eteginde, çeşmäň boýunda, Otyrdym men agaçlara syn ede. Şahasyndan tänip gaýtdy bir ýaprak, Tebigatda güýz diýilen senede. Tänen ýaprak çeşmä düşdi gaýmalap, Äkitdi ýapragy şildireýän suw. Ýaprak akyp barýar, hanaň içinde Suwy şaha bölýän harsaň daşlar dur. Gorkýan ýaly ýat menzile gitmäge, Ýaprak käte şol daşlara ýapyşýar. Tap getirip bilmän suwuň zarbyna Ýene akyp akym bilen tapyşýar. Şeýdip çeşme ýaprajygy äkidýär, Başga daga, başga hana, del ýere. Azaşan bende deý urunyp barýan Şol ýapragy hiç bir akym, hiç bir ýel, Getirmeýär şo-ol öňküje ýerine. • Güýzüň bir gijesi Ýary gije. Tutuş şäher uklady, Meniň bolsa oýanyşdy hyýallam. Daşa çykdym, köçelerde ümsümlik, Agşam ösüp başlan ýel hem haýallan. Köçede çyralar, asmanda bolsa, Ylham bolup ýyldyraýar ýyldyzlar. Gyz edaly güýz şemalnyň dilinde, Aýdylmadyk aýdymlaryň heňi bar. Daşa çykanymy görmedik bagyň, Şahalary penjirämi kakyp dur. Garaňky gijede Aýyň yşkyna, Didelerim söýgi bilen bakyp dur. Ýumşak şemal meçew aldy birdenem, Galgap gitdi egne ýaýlan saçlarym. Ýatlamalar uçup geldi geçmişden, Gözlerimden paýrap gaýtdy ýa:şlarym. Töwerek ümsümlik, eşdilýär diňe, Gursagymda ýüregimiň urgusy. Ne sebäpden munça düşnüksizkä, wah, Geçen günleň kalba salýan duýgusy. Bu gijede içim dökdüm şemala, Şemalyň badyna tänýär ýapraklar. Her ýapragyň ýere gaýyp gelşinde Gözel tebigatyň ajap raksy bar... Ranogül BAÝNAZAROWA. Çeşmesi: “Edebiýat we sungat” gazeti, 18.11.2022 ý. | |
|
√ At galar / Goşgular - 11.02.2024 |
√ Göreş / Goşgular - 11.02.2024 |
√ Tilki bilen üzüm / basnýa / Goşgular - 10.01.2024 |
√ Moskwadan görýärler / Goşgular - 30.01.2024 |
√ Alabahar / Goşgular - 21.03.2024 |
√ Dünýe... / Goşgular - 11.02.2024 |
√ Ynanarmykan? / Goşgular - 30.01.2024 |
√ Gökdepäm / Goşgular - 22.03.2024 |
√ Şemally gün / Goşgular - 27.01.2024 |
√ Dostluk hakda / Goşgular - 18.02.2024 |
Teswirleriň ählisi: 1 | ||
| ||