Hoşlaşyk

HОŞLAŞYK

Men menzile ýetdim, galaýyn munda,
Söýmesem-de, meni söýen, söwdügim!
Düşün, bu söýgüniň diregi men däl,
Özüni däl, söýgüsini söydügim!

Meni şu duralga tabşyr, aman git,
Uzak-uzak ýoldan bagtyňy sora!
Men seni,
Söýgüňi gorap bilmerin,
Gara göz, sen menden özüňi gora!

• Öýke ýazylyşyk pursady

Diýdim: – Senem özüň saýýarmýn adam?
Diýdi: – Adam bolman kimmiş, ýeri men?
Diýdim: – Adam, bu men toprakdan dörän,
Sen, jenanym, otdan dörän peri sen!

• Öküz hakda hakykat

Öküz, öküz, agta öküz,
Eg sen aşak şahly başy,
Salaýyn men nogta, ökýz!
Salaýyn men boýna hamyt,
Bol borjuňa pugta, öküz!
Dakaýyn men saňa azal,
Ýer gelipdir tagta, öküz!
Sägineňde çybyk çalsam,
Käýinme şor bagta, öküz!
Öküz, öküz, agta öküz,
Berekella, borjuň berjaý,
Ekdik bugdaý, arpa, öküz!
Däne bişdi, kaýyl bol sen,
Ykbalyňa – nagta, öküz!
Göz dikme sen käne, öküz!
Ýetdik paýyň saman boldy,
Ata ýetdi däne, öküz!
Öküz, öküz, agta ökýz,
Öýke etme bu gün saňa,
“Sag bol, öküz!” diýmeseler.
Näderdiň sen, ekeniňe,
At daksalar,iýmeseler?!
Sürüme çen, ekişe çen,
Sen aty öw, magta, öküz,
Öküz, öküz, agta ökýz...

• Sowal

Günäm oňa bir bakmanym, näzlim maňa müňkür bakar.
Bu söýgüniň towumy ýa?
Aý ýüze niçik bakaýyn, – baksam, gözüm şugla gapar.
Men kör bolsam, gowumy ýa?!

• Saňa

Gorkmasam-da ol gybatkeş dillerden,
Saňa “Söýýän” sözün pyşyrdap aýtdym.
Şol hyjuwuň özi bolup gygyrsam,
Birden aramyza ýaň düşer öýtdüm.

• Eşekli gürrüň

“Eşek” diýip, azgyrylýar eşege,
Ýöne ýola çyksa, eşekli gidýär,
Eşekli dolanýar öýe--işige.

• Sen niçiksi millet!

"Golýazma kitabym sile aldyrdy,
Duşmanymy jeýhun derýa eýledi".
Magtymguly.

Pyragyň kitabyn sil alan çagy,
Çakym, ýowuz haly bolandyr gören.
Çakym, türkmen içre tapylan däldir,
Sile kitap üçin özüni uran.

Sen niçiksi millet, niçiksi il sen,
Täk özüňmi bar bilýäniň, görýäniň?
Aňmadyňmy, akyly sil alanyn,
Kitap däl,
Milletiň akyp barýanyn?!

• Düwünçek

Allanyň buýrugy, pelek kadasy,
Ilki ekip, soňra orýar bar zady.
Bedew ölýär, naly galýar jahanda,
Är ölýär, älemde galýar şöhrady.

***

Aç ölmese bolar, golda kär bolsa,
Hanlyk sürse bolar, zer ýa zor bolsa.
Adam akylyndan azaşyp biler,
Eger serde ozal akyl bar bolsa.

***

Özüňi tanaman, gaýrat dileme,
Yzynda durmaga barmy şir ýürek?!
Kimdigiň bilmeseň, akyl dileme,
Götermäge hem akylly baş gerek.

***

Jüp sowala jogap tapman kemsindim,
Akyla öýkäm bar, heser, gam mende.
Gorkagy ýeňenler kimdir älemde?!
Gorkyny ýeňenler kim bolýar munda?!

***

Göterinip bilmen, belki, baýlygy,
Rysgal ber, namarda zar etme, Taňry!
Serime paýhas ber, dile parawuz,
Jylaw ber, geçmäýin özümden aňry.

• Ýene-de söýgi hakda

Munda höwes eýläp yşga düşen ýok,
Dänenem ýok gerek çagy erk eýläp.
Menem ýesir düşdüm söýgi goluna,
Söýgüm tutdy meni zabun, berk eýläp.

Gündiz bitap etdi, gije entetdi,
Bikarar, bitakat güzere indim.
Söýgüm menden ejiz ýa rüstem geldiň,
Bir günem gitdiň sen, lebziňden dändiň.

Aýan, gitmediň sen söýgüden dänip,
Bilýän, dänip gitdiň sen menden şol gün.
...Çendan söýgüm üçin aglasym gelýär,
Maňa düşünjek däl, geňlejek il-gün.

• Gaplaň

Bir kişiniň gaýraty deý gaýratly,
Kyrk kişiniň ýüregi deý ýürekli
Gaplaň, ykbalyňa gözüm gitmedi,
Seni wagşy saýyp ýörmek gerekmi?

Hamyňa güýçliler hyrydar-ýagy,
Läşiňe ejizler hyrydar-ýagy.
Hamyňy, deriňi goramak üçin,
Gaplaň bolman kim bolardyň sen dagy?!

• Diýjek sözlerim bar...

“Ogullaryma 40 öwüt” atly goşgular toplumyndan nusgalar

“Bölüneni böri iýer” diýerler,
Il bilen il boluň, il gorag, saraý.
Özüňiz börini iýjek bolsaňyz,
Bölüniň,
Özgeden gözlemäň haraý.

***

Siz hergiz şübheden yrak, daş durmaň,
Şübhe was-was hala ýetdigiň däldir.
Şübheden tazykmaň, ondan daş gitmäň,
Müňkürlige sary gitdigiň däldir.

Batyryň şübhesi – ýowa bahasy,
Dananyň şübhesi – geçirim ýaňra.
Serdaryň şübhesi – şöhrada germew,
Mollanyň şübhesi – ynamy Taňra.

Öz-özüňe şübhe – özüňe bahaň,
Ynam pyçak bolsa, şübhe çyn gyndyr.
Köňül gözgüsinde şübhe bar adam,
Adyllyga, eglişige ýakyndyr.

***

Agramy bolmazmyş gerekli daşyň,
Gerek daşy tanamakda gep bardyr.
Özgäň öwdi bilen daş götermäň hiç,
“Peşgeş berlen daş” yzynda çöp bardyr.

• Türkmenistanyň Döwlet Gerbinde ýerleşdirilen bedewe alkyş

Türkmen döwletine güwä üç nyşan,
Üçüň biri gerb töründe ornuň bar.
Sen Türkmene buýsanç,
abraý,
şöhrat şan
nesillere pederlerden ýadygär.

Türkmen janyn bedewine ynandy,
Höwürdi, syrdaşdy, dertdeşdi bile.
Şatlygy paýlaşdy, ýowuz günleri,
Başyňa baş goýup dertleşdi bile.

Akylly, asylly behişdi aty,
Türkmen doganyndan tutmady aýry.
Watany, namysy gorady bile,
Kowsa gutulmady del ýerli – saýry.

Türkmeniň söýgüsi taýlydy mydam,
Sap bedewe, sap gözele mejnundy.
Tumar dakyp, bezäp altyn – kümüşden,
Ibirşin ýüpekden besläni çyndy.

Atadan soň atyn görüp sabada,
Özünden öň iýdiripdi atyna.
At alnyndan çykan çüwen ykbaldy,
At segredip girdi taryh gatyna.

Daban ýalan gurrumsaklaň sülsady,
Bir gedemjik öňi bil büküp ençe.
Seni şol gedeme berdiler sowgat,
Ýöne ol kim, saňa eýe bolarça?

Sen türkmeniň asly halal malysyň
Namys goran atlaň nesli, Ýanardag!
Dowamy sen merde gardaş bedewleň,
Sap bedewleň sen sap asly, Ýanardag!

Laçyn dek bakyşly gözleri röwşen,
Sagrysy meýdanly, döşleri ýaýbaň.
Gamyş gulak, gülgün aýak kirş kimin,
Gül endama altyn suwy çaýylan.

Seni söýen iki dünýä ýalkanar,
Dil ýetiren şek ýok, dilinden tapar.
Gyýa bakan bahyl tapar gözünden,
Barmagyn uzadan pälinden tapar.

Dilegim, bedene gamçy degmesin,
Sen tisginme tebil tapyp hiç zaman.
Erkiň alynmasyn eýer salynyp,
Badyň alynmasyn uýan salynyp,
Baky erkana bol.
Bol baky aman!

Аmаnmуrat ВUGАÝЕW.