23:46 Kakama hat | |
KAKAMA HAT
Kaka! Durmuşda gyzlar üçin ilkinji şasy, hemişelik penasy. Ejeler hakynda hemmeler gaty kän ýazdylar ýöne kakalar barada welin, ýürekden ýazan azmyka diýýän. Men özümi bileli kakamyň meni söýýänini nähili gymmatly görýänini ýa bäş ýa alty ýaşlarymdakam bildim. Gyş aýynyň ýaňy başlanyna seretmezden howa gaty sowukdy, menem ilden öňürdip dümewledim. Daň bilen sagadyny bilemok ýöne daşary garaňky mahaly turup öýüň içinde aýlanmaga başladym. Hemmeler ýatyrdy. Ejemi turuzsam meni aýak üstünde görüp gaharlanar öýdüp gorkum bir ýana ýene ýakymsyz dermanlardan dadasym gelmeýärdi. Kakamyň ýanyna ýuwaşja baryp kakamy oýardymda törki jaýymyza alyp gitdim. Kakam ukyň arasynda yzyma düşüp gelşine egnine donunam ters atynypdyr. Başyna hemişe geýýän akgaýma tahýasyny almagam unutmandyr. Näme boldy gyzym diýip kakam maňlaýymdan gyzgynymy barlap aladaly sorady. Men gözlerimden hünji baryny gaçyryp ýatyp bilmeýänimi aýtdym soňam enemlerdäki gyşa goýlan gök turşuja almalardan iýesim gelýänini ýaňzytdym. Wah olar ýatandyr ahyry diýip kakam biraz durdyda Gyzym sen ýat men häzir saňa almajyk getirerin diýip çykyp gitdi. Daňdanyň garaňkysynda enemlere gidip lyýadaja gyşyň içinde alma getirmegem aňsat däldigini bilmändirin şol wagtlar. Inede kakam girip geldi tahýasyny gök almadan dolduryp menem begene-begene alma iýýän hamala öň iýilmedik üýtgeşik zat ýaly edip. Şondan kwn wagt geçmän men sagaldym. Hemişe bize özüniň çytuk ýüzüni görkezsede kakamyň kalbynyň iň töründe bize egsilmejek söýgi bardygyna ynandym şol günden soň. Haçan kakamyň gatyrgananyna ýa-da käýänine öýkelejek bolsam şol wakany ýatlap köşeşýän. Hemişe arkamyzda görünmeýän dag bolup birde algyr bürgüt kimin ganatlaryna üstümize geren kakamjan ömrüňiz uzak başyňyz dik janyňyz sag mertebäňiz belent bolsun! Aýlar ORAZMYRADOWA, Döwletmämmet Azady adyndaky Türkmen milli dünýä dilleri institutynyň talyby. | |
|
Teswirleriň ählisi: 1 | ||
| ||