Körpelere okap beriñ!

■ GARAÑKY

Jigim säher
Bile turup.
Penjiräni 
Açdy durup.

Birden bolsa 
Geldi sesi: 
— Gar, ýagypsyň, 
Gyş gijesi.

Garaňkydan 
Durman gorkup!
— Diýdi şatlyk 
Bile bakyp.

■ AK ŞELPE

Ak şelpesi 
Üçegiň. 
Diýýär ýere 
Düşerin.

Batyp dur-la 
Dere ol. 
Sallanypjyk 
Ýere ol.

Ýaşdan doly 
Gözjagaz, 
Diý­ýär: 
— Men-ä Buzjagaz.

Düşjek bolýan, 
Üçekden. 
Eger gaýtsam, 
Aşak men.

Degäýmesin 
Başyňa. 
Gara degre 
Daşyňa.

■ GYŞDA

Oýandy irden, 
Gün açyp gözi. 
Ýagtylyp gitdi, 
Dünýäniň ýüzi.

Daragt açypdyr, 
Ap-akja güli. 
Uzady Günüň 
Mähirli eli.

Ýöne nä birden 
Seretse bakyp. 
Seslendi güller 
Gözýaşy döküp.

— Ýyp-ýyljak eliň, 
Saçsana nury. 
Biz gül däl, gyşyň 
Sop-sowuk gary.

Mähir-nuruňdan 
Biz jana gelip. 
Çykarys ýerden, 
Akja gül bolup!

■ ŞADYÝAN GÜJÜK

Böke-böke, 
Iki ýana. 
Bir güjüjek, 
Şadyýana.

Oýun edýär, 
«How-how!» edip. 
Edýän menem, 
«How-how!» durup.

«How-how» sesi 
Göge ýeter. 
Men howlaýan 
Has-da beter.

— Edip­ma­ňa, 
How, how, howy. 
Öýkünmeklik 
Däl-ä gowy!

Diýdi güjük, 
Durman «howlap». 
Göýä ýüzüm 
Ýandy lowlap.

■ KYRKAÝAK

Gapyň agzynda, 
Seredýän durup. 
Men haýran, ýatan 
Kyrk köwşi görüp.

Seredýän çepe, 
Seredýän saga. 
Gelipdir öýe, 
Gör, näçe çaga.

Ýok, bir kyrkaýak 
Gelen ekeni.
Ol öýe myhman 
Bolan ekeni.

■ SERÇE

Şahajykda 
Otyr gyş ol. 
Kindiwanja 
Serçe guş ol.

Dogduk ýurtdan 
Ara açyp. 
Maýyl ýere 
Gitmez uçup.

Düşse düşsün, 
Sowuk gyş ol. 
Watan söýer, 
Serçe guş ol.

■ HORAZJYK

Horazjygyň 
Sesi gyryk. 
Ketegine 
Ýatyr girip.

Gyzgyny-da 
Galan eken. 
Bilmezler, nä 
Bolan eken.

Agyrýardy 
Çatlap başy. 
Dur towuklar 
Gurşap daşy.

Ýaşdan doly 
Gözjagazy. 
Iýen sowuk 
Buzjagazy.

■ GAR

Gar geldi gökden, 
Gaýmalap, gaýyp. 
Kebelek ýaly 
Ganaty ýaýyp.

Ýadan deý ýolda, 
Gar ýerde ýatyp. 
Görýärdi düýşi, 
Çuň uka batyp.

Turanok häli, 
Üç günden bäri. 
Gujaklap ýatyr, 
Mukaddes ýeri. 

Azat RAHMANOW.