Kowid-19 äjit-mäjit bolup bilermi?

KOWİD-19 ÄJIT-MÄJIT BOLUP BILERMI?

Kuranda geçmişde ýaşandygyna we gelejekde orta çykjakdygyna yşarat edilen äjit-mäjit aslynda adamlardan ybarat jemgyýet ýa-da özbaşyna bir kowum däl-de, eýsem adamzadyñ başyna bela bolup biljek, olary öýlerine, gaçybatalgalaryna gabap goýjak wirus bolup bilermi?!
Sowalymy biraz gönüläp bereýin: Injilde Gog-Magog, Kuranda Äjit-Mäjit diýip agzalýan mahluklar koronawirus, ýagny kowid-19 bolup bilermi?
"Kehf" süresinde äjit-mäjitleriñ wagty we ýeri anyk görkezilmezden geçmişde ýaşap geçen millet ýaly gürrüñi edilýär, olaryñ daş-töwerege zyýan berýändikleri üçin Zulkarneýiniñ öñlerine ördüren beýik diwar arkaly ýollarynyñ baglanandygy aýdylýar (18/93-97). "Enbiýa" süresinde bolsa äjit-mäjit diýen milletiñ gelejekde orta çykjakdygyndan söz açylýar, bu ýerde-de wagtdyr ýer agzalmazdan wagty-sagady gelende äjit-mäjidiñ öñüniñ açyljakdygy nygtalýar (21/96-97).”[1]
Geçmişde, ýagny Kuran inderilmezden öñ Ad, Semut, Nuh, Lut kowumlary ýaly birnäçe kowmy ýok eden melamatlara, Kuran inenden soñky döwürlerde bolup geçen çuma, ysytma, holera we ş.m epidemiýalara, häzirki wagtda bolup duran korona belasyna üns berenimizde, äjit-mäjit diýlen zadyñ haýsydyr bir kowum ýa-da adam jemendesi däl-de, ynsanlary köpçülikleýin gyrmaga ukyply wirusdyr mikrop bolup çykaýma ähtimallygynyñ bardygyny pikir etmezlik mümkin däl.
Müftüligiñ Yslam ensiklopediýasynda "äjit-mäjit" adalgasyna berilen şu düşündiriş meniñ ünsümi çekdi:

“Äjit-mäjit - daş-töwerege ýaýrap, weýran ediji zyýan ýetirýän ýakyp-ýandyryjy jemendelere aýdylýar. Kuran geçmişde bolşy ýaly gelejekde-de özünde bu sypaty göterýän toparlaryñ orta çykjakdygyny habar berýär. Bular ymgyr kän jemendedir we ýer ýüzünde pitne-pesat çykararlar... Şeýle-de kyýamat ýakynlaşanda äjit-mäjidiñ diwary aşandan soñ alañlardan, depelerden aşyp ýer ýüzüne ýaýrajakdygy, giden her bir ýerini ýakyp-ýykjakdygy, adamlaryñ gorkudan ýaña galalaryndan we gaçybatalgalaryndan çykyp bilmän oturjakdygy...”[2]

Tefsirçileriñ äjit-mäjit kowmuna yşarat eden "...diwary aşandan soñ alañlardan, depelerden aşyp ýer ýüzüne ýaýrajakdygy..." baradaky jümlesine salgylanýan alymlaryñ birnäçe gün bäri teleýaýlymlardan "kowid-19-yñ mutasiýa geçirip öýjügiñ diwaryny ýarýandygy, kilidini çözendigi", ýagny "wirusyñ mutasiýa geçirip öýjügiñ diwaryny aşýandygy" görnüşinde beren düşündirişlerini deñeşdirip görýäñ welin, isleseñ-islemeseñ koronawirus belasy äjit-mäjit bolaýmasyn diýen pikiriñ güýçlenip başlaýar.
Has takygy, Injilde Gog-Magog, Kuranda Äjit-Mäjit diýlen kowumyñ birnäçe çeşmede pessejik boýly adamlardygy, Aziýada ýüze çykjakdygy, aýatda agzalýan diwaryñ Hytaý diwarydygy we bu kowmuñ bolubilse hytaýlylar bolup çykaýmagynyñ mümkindigi barada garaýyşlar bar.[3]
Kuran äjit-mäjitleri geçmişde bolup geçip, adam oglunyñ başyna bela bolandygyng we gelejekde-de ýene ýüze çykyp, adamzadyñ depesinden injek kowumdygyny aýdandygyna görä, bu mahluk jemendesi ýok bolup giden, nesli tükenen kowum bolup bilmez!
Eger bu jemende adamlardan ybarat topar bolsa, onda täsirliligini ýitirenem bolsa häzir ýaşaýarlar we gelejekde ýene güýçlenip, adamzadyñ başyna musallat bolmagyna garaşylýar (ýa-dä häzir bolup dur) diýmekdir!
Ýok, eger bu kowum ýok bolup giden we nesli kesilen bir kowum bolsa hem-de gaýtadan adamzadyñ başyna bela boljak bolsa, bu ýagdaý, elbetde ynanýanlar üçin diñe magşardan soñ bolup geçmeli zatdyr.
Hususanam, geçmişde adamzadyñ başyna bela bolan, gelejekde-de bela boljak äjit-mäjit, ýa-ha gadymy eýýamlardan bäri we häzirem ýaşap ýören, meselem hytaýlylar ýaly özbaşyna bir halk bolup biler, ýa-da adamdan üýtgeşik jandar, ýagny wirus, bakteriýa ýa-da mikrop diýip atlandyrtlan mahluk.
Türki halklara duşmançylyk beslän käbir arap alymlary äjit-mäjit diýilmekden maksat: ýüzlerçe ýyllap özlerinine häkimlik edendigi üçin ýigrenç bildirip, ar almaga çalyşýan Türki halklardygyny aýdypdyrlar. Hatda olar bu şahsy ýigrençlerini sahyh hasap edilen hadys kitaplaryna-da sokmagy başarypdyrlar.
Kowid-19-yñ Hytaýyñ Uhan şäherinden çykyp, Hytaý diwaryny we onlarça dagy-düzi aşyp ýer ýüzüne ýaýrandygyna, hatda bu wirusyñ hytaýlylar tarapyndan laboratoriýa şertlerinde taýýarlanandygy baradaky komplimasiýa teoriýalaryna üns berenimizde, wakalaryñ näderejede çynlakaýlaşýandygyna göz ýummak mümkin däl. Şeýle dälmi?
Bolup geçýän zatlary seljeriñ bakaly, şeýle düşünmäbilşiñize düşünmäñ!
Näçe gün bäri öýüñizden çykyp bilmän oturmagyñ berýän täsirinden ýaña nämeleri düşünýänsiñiz, şeýle dälmi?
Her näme-de bolsa, şarlatanlaryñ edähedine eýerip, "aýdýanlarym hakdyr" diýmek islämok, elbetde. Men diñe köçä çykmagyñ gadagançylygy zerarly öýlerinden çykyp bilmän, internete höwrügen ynsanlara hytaý çaýyndan demlenen bir käse çaý hödürlemek isledim...

11.04.2020 ý.

Ömer SAGLAM.

[1] https://islamansiklopedisi.org.tr/yecuc-ve-mecuc,
[2] Şol ýerde.
[3] bk. https://tr.wikipedia.org/wiki/Ye%27c%C3%BCc_ve_Me%27c%C3%BCc

Terjime eden: Guwanç MÄMILIÝEW,
Stambul uniwersitetiniñ talyby.