Ilkinji futzal oýnuny braziliýalylar oýnapdyr. 1958-nji ýylda Şwesiýada futbol boýunça dünýä çempionaty geçirilende Awstriýanyň milli ýygyndysynyň ýolbaşçylarynyň biri Ýozef Argauer braziliýalylaryň bina içindäki futbol türgenleşigini synlaýar. Bu ýagdaý onda uly täsir galdyrýar. Ol öz ýurduna dolanyp geleninden soň öz tälim berýän oýunçylaryna türgenleşikde futzal oýnamagy teklip edýär. Şondan soňra sportuň bu görnüşi Italiýa, Ispaniýa, Gollandiýa döwletlerine ornaşyp başlaýar.
1968-1969-njy ýyllarda Gollandiýada ilkinji gezek futzal boýunça milli çempionat geçirilýär. Onuň ýeňijisi «Saga 66» topar bolýar.
1970-nji ýyllaryň ortalarynda sportuň futzal görnüşi ösüş ýoluna düşýär. 1974-nji ýylyň 19-njy iýulynda Rim şäherinde milli ýygyndylaryň arasynda ilkinji futzal oýny geçirilýär. Italiýanyň ýygyndysy Liwiýanyň ýygyndysyny 9:2 hasabynda ýeňýär.
Ýygyndylaryň arasyndaky ilkinji halkara ýaryş 1986-njy ýylda Budapeştde geçirilýär. Oňa 8 döwlet gatnaşyp, final duşuşygynda wengriýalylar Gollandiýanyň milli ýygyndysyndan rüstem gelýärler. Ilkinji resmi dünýä çempionat bolsa 1989-njy ýylda Gollandiýada geçirilýär we Braziliýa çempion bolýar.
Futzal oýnunyň pökgüsi futbol pökgüsinden kiçi bolýar we her toparda derwezeçi bilen bilelikde 5 oýunçy oýnaýar. Bu oýunda oýunçy çalşyrmak düzgüni çäklendirilmedikdir hem-de oýundan daşary ýagdaý hasaba alynmaýar.
Internet maglumatlaryna görä, dünýäde 30 milliondan gowrak adam futzal oýny bilen meşgullanýar. Munuň özi futzaly sözüň doly manysynda millionlaryň oýny diýip atlandyrmaga esas berýär.
Jahantäç Öwezowa,
«Mawy yşyk» başlangyç hünär okuw mekdebiniň talyby.
