Şygyrlar

ŞYGYRLAR

Toý tutmaga äht edipdik öň bile,
Ikimizi goýmadylar soň bile,
Indi hoşlaşyp dur jan bilen köňül,
Jan gitse-de köňül galar seň bile.

Durmuşymyz bir mylaýym sazdyr, ýar,
Öýkeleriň öýke däl-de, ýazdyr, ýar,
Doly beýan etmäge seň waspyňy
Bir ömür däl, bäş ömür hem azdyr, ýar.

(“Garagum" žurnaly №2, 2013 ý.)

• Tilki we gatyr

Gatyr bellenildi uly wezipä,
Ýygnak boldy, Tilki şonda söz aldy:
—Bu bir baryp ýatan asylzadadyr,
Enesi-de tüýs bir tohum baýtaldy.

Gatyr boşadyldy wezipesinden,
Ýygnak boldy, tilki münbere çykdy:
—Ozalrak syrtyna depmek gerekdi,
Munuň atasy bir aýgyr eşekdi.

***

Toý tutmaga äht edipdik öň, bile,
Ikimizi goýmadylar soň bile,
Indi hoşlaşyp dur jan bilen köňül,
Jan gitse-de, köňül galar seň bile.

Durmuşymyz bir mylaýym sazdyr, ýar,
Öýkeleriň öýke däl-de, ýazdyr, ýaz,
Doly beýan etmäge seň waspyňy
Bir ömür däl, bäş ömürem azdyr ýar.

• Üçlemeler

Habar al halymdan eý zülpi towar!
Orta ýolda galdym nirä gideýin?
Gözleriň çagyrýar, sözleriň kowar.

***

Gygyrma gulagna, Watan ker däldir—
Minnet etmän, şowhun etmän söýüp bor
“Söýýän” diýmek bilen söýmek bir däldir.

***

Kerem eýläp, nazar aýlap golaýdan,
Goraweri, Allam, goç ýigitleri,
Äri bilen dawalaşýan heleýden.

***

Maňa uzak-uzak ýaşy gerek däl,
Allanyň emrini diňle Ezraýyl!
Bilmeýän zatlarma göz ýetirýänçäm,
Puryja berilse, men şoňa kaýyl.

***

Gözelligiň gözleginde gezmeklik,
Sungat adamynyň käridir-käri,
Ýaryň waspyn edip, goşgy ýazmaklyk,
Şahyr üçin melhem, däridir-däri.

***

Utanman, münberde köp durup bilseň,
Öwgi baryn dilden sypdyryp bilseň,
Saňa “tüýs dilewar” diýjeklerem bar,
Illerden artygrak çypdyryp bilseň.

***

Gel köňül dünýäde messan gezeli,
Goşgylar goşaly, aýdym ýazaly,
Erkekler bir erkek bolsun mazaly,
Hat-da aýallaram heleýlemesin. (“Golaýlamasyn”)

***

Gamdan gutar, bagtyýar et, gel meni,
Düýşde görmeseň-de ýada sal meni,
Men seni almasam, özüň al meni,
Özüň meni idäp—sorap gel gelin! (“Gül gelin”)

***

Eý dostlarym, şu bäş günlük dünýäde
Süllermedim, täze-ter bolup geçdim,
Näçe ýük ursalar, bagyrmadym hiç,
Göýäki bir ýükçi ner bolup geçdim.

Barmasyz ýerlere barmazlyk üçin,
Görmesiz zatlary görmezlik üçin,
Gep-gybata gulak germezlik üçin,
Mysaly bir kör hem ker bolup gezdim. (“Geçdim”)

***

Goç ýigide ähdi-peýman bir bolar,
Akyldaryň sözlän sözi dür bolar.
Adam öz ýurdunda mysapyr bolar,
Her kimiň hukugu-haky bolmasa. (“Ýüki bolmasa”)

***

Ýykylsaň-da, bil, galamaga umyt bar,
Hassalasaň sagalmaga umyt bar,
Ýurtdan çyksaň dolanmaga umyt bar,
Bu—hemme zatlaryň gutardygy däl. (“Bu—hemme zatlaryň gutardygy däl”)

***

Tämizi diýr, çekseň çydamsyz derdi,
Naçarlama, bolgun mertleriň merdi,
Sensizem bu heňňam aýlanyp durdy,
Dünýe ýetim galmaz öleniň üçin. (“Bolanyň üçin”)

Pygamberguly GURBAN TÄMIZI.