Главная » 2022 » Iýul » 14 » Türk serialyndaky türkmen aktrisasy
08:25

Türk serialyndaky türkmen aktrisasy

TÜRK SERIALYNDAKY TÜRKMEN AKTRISASY

Golaýda türkmen pälwany, türgeni Döwletjan Ýagşymyradowyň Türkiýäniň “ATV” teleýaýlymynda ýaýlyma berilýän “Kuruluş Osman” teleserialynda keşp janlandyrandygy baradaky habarlary okyjylar köpçüligine ýetirdik.
Ýöne, görüp otursak, bu teleserialda ozal bäri, ençeme seriýada keşp janlandyran başga bir türkmen gyzynyň bardygyny hem bilip galdyk. Ol türkmen gyzymyz Gözel Rowşanowadyr.
“Atawatan Türkmenistan” halkara žurnaly hökmünde Gözel Rowşanowa bilen onuň “Instagram” jemgyýetçilik torundaky hasaby arkaly habarlaşdyk. Oňa birnäçe sowallar bilen ýüzlendik. Ol hem biziň sowallarymyza uly höwes bilen jogap berdi.
Gözel bu türk serialynda 49-njy seriýadan bäri keşp janlandyryp gelýär. Häzirki wagtda bu serialyň 98-nji bölümi ýaýlyma berildi we möwsümleýin arakesme çykyldy.
1995-nji ýylda doglan Gözel Rowşanowa 2012-nji ýylda Türkiýe Respublikasyna barýar. Ol Türkiýe Respublikasynda sungat ugry boýunça bilim aldy. Gözel Stambul şäherindäki Stambul Aýdyn uniwersitetiniň Şekillendiriş sungaty fakultetiniň drama we aktýorlyk bölümini tamamlady. Häzirki wagtda ol şol uniwersitetde sahna sungaty boýunça aspirantura okuwyny dowam etdirýär.
Ol türk serialynda keşp janlandyryp başlan ilkinji türkmenistanly boldy. Soňra Döwletjan bu topara goşuldy.
Gözel özüniň türk serialynda keşp janlandyrmagyň uly tejribe bolup durýandygyny belläp, bu ýerde onuň sungata bolan ukybyna uly baha berlendigini mälim etdi. Daşary ýurtly aktýorlar bilen keşp janlandyrmak oňa kyn düşmändir. Ol doganlyk ýurt bolan Türkiýäniň sungat işgärleriniň tagallalary bilen seriala çalt girişendigini belledi.
Gözel serialda Alaja hatunyň keşbini janlandyrýar. Bu serial 2019-njy ýylda ýaýlyma berlip başlandy. Onuň esasy mowzugy Osman imperiýasynyň esaslandyryjy Osmanyň durmuşyny açyp görkezmekden ybaratdyr.
“Bozdag film” kompaniýasy tarapyndan surata düşürilýän bu film 2014-2019-njy ýyllarda “TRT” teleýaýlymynda ýaýlyma berlen “Diriliş Ertugrul” serialynyň dowamydyr.

Çeşmesi: https://www.atavatan-turkmenistan.com/turk-serialyndaky-turkmen-aktrisasy/. 14.07.2022ý.
Категория: Teatr we kino sungaty | Просмотров: 451 | Добавил: Bagabat | Теги: Gözel Rowşanowa | Рейтинг: 2.3/3
Awtoryň başga makalalary

Teatr we kino sungaty bölümiň başga makalalary


Teswirleriň ählisi: 5
0
1 Bagabat  
43
Tüweleme.
Berekella.

0
2 Haweran  
411
Daşary ýurtlara, ylaýta-da Türkiýä işlemäge, okamaga (esasanam işlemäge)... giden ýüz müñlerçe ildeşlerimiz bar. Şolaryñ iñ bolmanda dörtden bir bölegi baran ýurtlarynda sungatyñ dürli ugurlary (aýdym-saz, teatr we kino sungaty we ş.m.) boýunça ýokary okuw jaýlarynda bilim alsadylar ýa-da bilim almaga gönükdirip bolsady (sportuñ iñ populýar ugurlary boýunça hem tälim alsadylar), soñ şolary erkin ýagdaýda öz medeniýetimizi, halkymyzyñ medeni-intellektual derejesini ýokarlandyrmaga goşant goşduryp bolsady... diýip hemişe edip gelen arzuwym şudy (türk taryhy seriallarynda soñky wagtlar ýygy-ýygydan çykyş edip başlan ýaş azerbaýjan, gazak, özbek aktýorlarydyr aktrisalaryny görüb-ä hasam).

* * *

Biziñ öz ýurdunda gadry bilinmeýän, goldawy ýetirilmeýän, emma daşyna çyksa sähelçe goldawa zehini, ukyby gül bolup açylýan uçursyz zehinli ýaş oglan-gyzlarymyz köp.

* * *

Elbetde, daşary ýurt teleseriallarynda çykyş edip tejribe toplasalar, muña ýetesi zat ýok. Ýaşlarymyzyñ türkleşip, ýagny, goñşy medeniýetleriñ täsirinde ýitip gitmezligini hasam isleýäs. Nesip bolsa, gelejekde, milli koloritde, ýerli türkmen motiwinde çeper filmlerdir taryhy seriallary döretjek ukyply kino işgärlerimiziñ bu talaby añryýany bilen ödejekdiklerine ynanasymyz gelýär.

* * *

Ildeşimiz Gözele berekella diýýäris. Yzy gür bolsun.

0
3 Haweran  
411
Gözel Rowşanowanyñ türkmenistanlydygy baradaky maglumat şübheliräk öýdýän. "ATAVATAN-TÜRKMENISTAN" žurnaly muny nämä esaslanyp ýazdyka? Bu barada gyzyklanyp gördüm welin, G.Rowşanowa barada türk saýtlarynyñ birem anyk maglumat berenok. Bar bolanja maglumatlaram onuñ 1995-nji (edil 93-95-lerde bizde Türkiýä gidip ýören ýok bolaýmasa?) ýylda Stambulda doglandygyny (başga bir maglumatda 1993-nji ýyl) we aslynyñ özbegistanly bolaýmagynyñ mümkindigini aýdýar.

0
4 rmametgurbanow  
295
Berekella

0
5 ❤GÜLHANYYM❤  
1369
Dowam

Teswiri diňe saýta agza bolan ulanjylar goşup bilýär.
[ Agza bol | Saýta gir ]