Fransiýanyñ "Charlie Hebdo" žurnaly bütin dünýäde näletlendi

FRANSIÝANYÑ "CHARLIE HEBDO" ŽURNALY BÜTIN DÜNÝÄDE NÄLETLENDI

• "Charlie Hebdo": "Türkiýede ýer titredi. Tank ýollap oturmagyñ geregi ýok"

Öñem telim gezek halklaryñ dini ynançlaryny ýañsylaýan masgaraçylykly karikaturalary bilen ünsi özüne çekip gelen çepçi-anarhist "Charlie Hebdo" satiriki žurnaly Türkiýede bolup geçen ýer titremesini karikatura geçirdi. Gürrüñi gidýän karikaturada žurnal müñlerçe adamyñ gurban bolan tebigy betbagtlygyny ýañsa aldy.
"Charlie Hebdo" müñlerçe adamyñ aradan çykan Kahramanmaraş ýer titremesiniñ karikaturasyny "Türkiýede ýer titredi. Tank ýollap oturmagyñ geregi ýok" ýazgysy bilen berdi. Hem Türkiýäniñ, hem dünýäniñ dürli ýurtlarynyñ sosial mediýa ulanyjylary žurnalyñ bu samsyklaç hereketini ýazgardy.

• Birinji gezek şeýdenok

"Charlie Hebdo" mundan öñem Italiýadaky ýer titremesini ýañsylapdy. Žurnalyñ 2016-njy ýylda Italiýada 294 adamyñ gurban bolan ýer titremesinde-de çeken karikaturalary gazaply ýazgarylypdy.
"Feliz" lakamy bilen çekilen "Italiýa ýer titremesi" karikaturasynda şekillendirilen ýaralylar italýan wermişellerine meñzedilip, ýykylan jaýlaryñ, kesekleriñ aşagynda galanlaryñ meşhur italýan nahary gatlakly hamyrdan bişirilýän lazanýa meñzedilmegi halky gahar-gazaba mündüripdi.
Karikaturanyñ Italiýada ýazgarylmagyndan soñ žurnal, gurban bolanlaryñ ýakynlaryndan ötünç soraýjak ýalydy welin, gaýtam, olara ikinji karikatura bilen jogap beripdi. "Charlie Hebdo" gaharly italýanlara "Öýleriniñizi "Çarli Hebdo" däl, mafiýa gurdy" diýip seslenipdi. Birinji karikaturasy bilen perwaýsyzlykda aýyplanan "Charlie Hebdo" ikinji karikaturasy bilenem Italiýany mafiýadan we wermişelden ybarat ýurt hasaplap başlapdy.

Çekişmäniñ gitdigiçe ula ýazmagy Fransiýanyñ Italiýadaky ilçihanasyny bu boýunça beýanat bermäge mejbur etdi. Ilçihana "Çarli Hebdonyñ" karikaturasy Fransiýanyñ garaýşyny añladanok" diýdi.
Häzirki italýan gazetleriniñ köpüsinde "Çarli Hebdo" çekişmesi baş sahypada ýerini aldy. "Il Tempo" gazeti nägilelik döreden karikatura başga bir karikatura bilen jogap berdi. 2015-nji ýylda žurnalyñ redaksiýasyna edilen hüjümi şekillendirýän karikaturada "Pariž sousy" rubrikasy bilen "Gadyrly fransuzlar, şeýle karikatura sizi güldürip bilermidi?" diýildi.
"Il Giornale" gazeti-de "Biz "Charlie Hebdo" däl" rubrikasy bilen çykdy. Gazet "Ýumor hukugynyñ hemişe arkasynda durýas. Emma ölüleri ýañsylamak ylalaşyp bolmajak ýigrenjilikdir. Hem munuñ hiç hili gülkünç ýeri ýok" diýip ýazdy.

• Satira däl, zibil!"

"Forza Italia" partiýasynyñ şol wagtky deputatlaryndan Barbara Saltamartini Twitter hasabyndan: “Çarli Hebdonyñ" karikaturasy ýer titremesinde gurban bolan ildeşlerimiziñ degnasyna degýär we ynjydýar. Žurnal satiriki organ däl, ol barypýatan zir-zibil!" diýip, çykyş etdi.

Yslam we hristian dinlerine garşy çeken skandal karikaturalary bilen tanalýan žurnal tolkunlaryñ deñziñ kenaryna getirip zyñan siriýaly neresse çagajyk Aýlan Kurdini hem ýañsa alypdy.

Žurnalyñ bu gezekki prowokasiýasyna Germaniýanyñ "Team Todenhöfer" partiýasynyñ başlygy, ýazyjy Ýurgen Todenhýofer hem nägileligini bildirip, Twitterden paýlaşan ýazgysynda "Adamlaryñ gynanjyny ýañsylamak nähili ýigrenji zat!" diýip yazdy.
Todenhýofer nemes dilinde ýazan ýazgysynyñ soñuny iñlisçe "Fuck you", yagny, "S****n sizi" diýip soñlady.

• Abrar Sabbah žurnala gerekli jogabyny berdi

Karikaturaçy Abrar Sabbah Fransiýa çap edilýän hepdelik satiriki žurnal "Charlie Hebdo"-nyñ Türkiýäniñ başdan geçiren ýer titreme heläkçiligi hakdaky çap eden karikaturasyny täzeden şekillendirdi.
Suratkeş Sabbah sosial mediýa hasabyndan goýberen wideoýazgysynda fransuz žurnalynyñ Türkiýäniñ başdan geçiren karikaturasyny täzeden şekillendirip, ""Heý, ahlaksyz "Charlie Hebdo"! Olar ýaly çekilmeýär. Ine, şeýle çekilýär! Biz ýañadandan aýaga galarys. Bu güýçli millet ýañadandan aýaga galar!" sözlerini paýlaşdy.
Çeken suratyny žurnalyñ sosial mediýadaky hasabyna-da ýollan Sabbahyñ karikaturasy az wagtyñ içinde müñlerçe laýk toplady we internet ulanyjylary tarapyndan paýlaşyldy.

• Žurnala ýene bir jogap Gresiýadan geldi

"Charlie Hebdo" žurnalynyñ karikaturasyna jogap edip, Gresiýanyñ "Kathimerini" gazeti karikatura paýlaşdy. Gazetde çap edilen karikaturada ýykylan jaýlaryñ üstünde asmandaky ýarymaýyñ gözünden ýaş damýar.

# Internet maglumatlary esasynda taýýarlandy.