Başa eýgertmez

BAŞA EÝGERTMEZ

Zelilä täsirlenme

Daglarda ýygnalyp möwjäp gelen sil,
Berk gaýa bolmasa daşa eýgertmez.
Gum sowuryp, tozan turzup gelen ýel,
Penaň berk bolmasa döşe eýgertmez.

Penjeläp götäre tilki, towşany,
Algyr gerek, her guş oňarmaz şuny.
Ozalda mert doglan, öňe düşeni,
Yzda goýmak deň-u-duşa eýgertmez.

Bela-beter ýazylanda maňlaýa,
Sypdyrmaz, gizlenip gömleňde laýa.
Aňsyz özün biläýmese aňlaýa,
Keseki aňyna, huşa eýgertmez.

Bahyllygy artar göräýse käni,
Görip gözi ýykyp biler ençäni.
Perzent çalşa bilmez ata-enäni,
Mährini duýmasa, hoşa eýgertmez.

Bil şunam, arrygyň gynama, daýan,
Keçeňek gedeme söz ötmez, aýan.
Azan aýal bilmez, nämedir haýaň,
Bir äre däl, ýüz-müň başa eýgertmez.

Geldimyrat başa düşdigi zulum,
Gorkmadan gözleme onuň em-ýomun.
Bir başa jedelsiz bardyr bir ölüm,
Gutulaýmak garry-ýaşa eýgertmez!

2021 ý.