Çyragym, öçmeseñ bes!

ÇYRAGYM, ÖÇMESEÑ BES!

Ak perişde atama
Guwanjak çagym meniñ.
Goja ýaşda atama
Ýagtyl, çyragym meniñ.

Arman, hazan aýnadan
Girip, gapydan ötdi.
Men bendäni aglada,
Adam janym äkitdi

Şuwlaýan gara ýeli
Neçün inim söýenok.
Alajym ýogam weli,
Günüme-de goýanok.

Ak perişde eneme
Guwanjak çagym meniñ.
Şugla saç-da eneme,
Ýagtyl, çyragym meniñ.

Gara ýel şuwlap-şuwlap
Alyp gitdi enemem.
Çekmenmi uwlap-uwlap,
Bu ölümi ýene men.

Ýene şuwlap gara ýel
Öñde ölümiñ baryn
Habar berýär, oña men
Taýynmy, dälmi, barlap.

Indi ula ymtylman,
Diýýän palomino tutup pes:
Ýagtylmasañ, ýagtylma,
Çyragym, öçmeseñ bes!

* * *

Bahar ak gül bolup gondy erige,
Gök öwüsdi düýnem ýalazy ýerler.
Jañ kakylan ýaly dymma eñege,
Ýar posasyn köpräk küýseýär lebler.

Parç bolupdyr meýdan narpyz, selmeden,
Burk urýar hyrawa gülleñ ysy-da.
Geldi bir ýerlerden, çatma-külbeden
Taşlanan güjügiñ çyñsamasy-da.

* * *

"Sen aman bol bu dünýäde".

Sen aman bol bu dünýäde,
Bu dünýäde sen aman bol.
Men ölümi salsam ýada,
Sen bir ýatlap galma derde,
Gezseñ nirde, bolsañ nirde
Sen aman bol bu dünýäde.

Dert geler dermany ýokdur,
Agarar gara saçlaryñ.
Zary bar-da zory ýokdur
Gatyny gören başlaryñ.
Çöññeler gider göz-dide,
Ýöne aman bol dünýäde.

Etjegni edibilmesem,
Bogar Putman, ahmyr meni.
Ýetjegme ýetebilmesem,
Ahym alar ahyr meni.
Göwnüñ geçer seññem menden,
Galanymda dat-bidada,
Sen aman bol hemem ondan
Sen azat bol bu dünýäde.

Gyzlar bir-bir göçer gider,
Mähribandyr, ogul däldir.
Menden döwran geçer gider,
Bu bir başy aýlan ýoldur.

Galsam orta ýol-ýodada,
Sen bir ýaşa, bu binýada
Renç berip,
Söýünç berip,
Aman bolup bu dünýäde.

Kasam etdim, peýman etdim,
Käte aldym yzyna-da.
Rüstem bolup perman etdim,
Zor saldym men özüme-de
Gidenimi aşa-öte
Giç bildim men, goý, olardan
Sen azat bol bu dünýäde.

Meý-mest boldum men bilen men,
Azaşdymam akylymdan
Hem tomaşa, toý bilen men
Kän gidişdim öz çakymdan.
Gereginden artyk käte
Kowalaşdym şöhrat, ada.
Goý, olardan sen azat bol,
Sen aman bol bu dünýäde.

Sen halas bol meniñ halas
Bolup bilmedik zadymdan.
Sen köpräk al meniñ halap
Alyp bilmedik zadymdan.
Hem gutul sen meniñ nalap
Gutulabilmedik zarymdan.
Men dek ýanman otsuz oda,
Sen aman bol bu dünýäde.

* * *

Uzyn-uzyn agaçdan
Üstüme saýa düşüp.
Giñäp, ýaýnap oturýan.

Gaý abansa iç-daşdan
Ilkinji gerýär döşün,
Yzdaka howp ýetirmän.

Özüni kelte başdan
Belent tutman, oñ işin
Eder oña ýetirmän.

Kökem ýuwaş-ýuwaşdan
Göwsün ýarar dag-daşyñ.
Ösmez hyzmat bitirmän.

Soñ garrar, aglyp güýçden,
Jahanda çäkli ýaşyñ,
Bolmaz ömrüñ ötürmän.

Ol töññe irde-giçde
Kersen bolar, gardaşym,
Gury ýanyp oturman.

* * *

Uly suwdan gol bölündi.
Bolmakçydy ene ýap ol.
Bolmakçydy ýa köl indi,
Akdy özün tanaman ol.

Göründi o ýan, bu ýanda
Çäge ýeriñ gorp atany.
Birdenem döredi onda
Ýitip gitmäñ howp-hatary.

Epgek-jöwza öñi-yzy,
Gün bugardyp alyp barýa.
Onsoñ ýene-de öz-özi
Baryp guýdy uly derýa.

* * *

Urşup ýeñildimi,
Ýaralandymy
Ýa-da tapyndymy bolgusyz kesel?
Iýýän ýalyn ödemekden galdymy...
Wepaly itdi ol,
Çykman üýn-sesem
Ötägitdi,
Bilmän galdy eýesem.

Gitdi öýden öz-özüne zor salyp,
Ajalyna,
Kaýyl gelip ölümne.
Ejizläp ölmegi namys-ar bilip,
Ölmäge gitdi ol ölmejek bolup,
Eýesiniñ gözleriniñ öñünde.

• EMEL

Şahada sallanşyp duran hozlaryñ
Daşynda guş bary urdy pelesañ.
Alyp bilmän horlamady özlerin,
Döwüp bilmän görgä galdy, garasaý.

Bir guş bolsa alan hozun birdenkä
Dik depeden daşly ýere oklady.
Yzy bilen düwlüp gaýdyp, ýerdäki
Pytrap ýatan mañyzlary çöpledi.

Gowşut ŞAMYÝEW.