HAKYKY GÜLKİ Ol gün işdeş gelinlerimize bir sorag berdim: "İň soňky gezek haçan çynyňyz bilen gülüp gördüňiz? Hakyky gülki bolýandyr, gülüp-gülüp, gözleriň ýaşaryp, içiňi tutup iki bükülip gülmek". Hiç kimiň ýadyna düşmedi. Köpüsi: "Çaga wagtymyz bolaýmasa?" diýip, jogap berdiler. Özümiň-de haçan şeýdip gülenim ýadyma düşenok. Dogrusy gülýäs, her gün gülýäs. Ýöne, edil şol dereje gülemzok. Çyn ýürekden gülemzokmy, ýa bir aladamyz barmy? Bilmedim... Gadyrly agzalar, siz soňky sapar haçan şeýdip, gözüňizi ýaşdan dolduryp gülüp gördüňiz?
Üç-dört gün mundan ozal, gaty çynym bilen güldüm. Meni güldüren wakany gatnaşyp ýören tanşym gürrüň berdi. Edaralarynda başlygyň orunbasary “Durdy aga” atly ýaşuly ekeni. Onsoň, edaralaryna täze garawul alypdyrlar. Başlygyň tabşyrygam, derwezeden girýän-çykýan ulaglar barada kabulhana habar bermek. Onsoň, şol gün irden, Durdy aga öz gulluk ulagynda edara gelýär. Täze garawul derwezäni açyp, ony howla goýberýär-de, soňra ol barada habar bermek üçin içerki aragatnaşyk boýunça kabulhana jaň edýär. Kömekçi ýerinde bolmansoň, başlyk telefony alýar. Salamlaşýarlar. Garawul habar berýär: -Pylança-pylança belgili awtoulag howla girdi. -Durdymy?-diýip, Durdy agaň ulagynyň belgisine belet başlyk soraýar. -Ýok, durmady, göni geçip gitdi,-diýip garawul jogap berýär :-).
Teswiri diňe saýta agza bolan ulanjylar goşup bilýär. [ Agza bol | Saýta gir ]
0
