Nukdaýnazar

NUKDAÝNAZAR

atly täze sahypamyza hoş geldiñiz!

Uzak wagta çeken işlerimiziñ netijesini gazanyp ugradyk. Şu günden şeýläk kitapcy.ru saýtynda hemişelik blogger-awtorlar topary işläp başlar.
Kitapçy saýtynyñ ýörite awtorlygyna saýlanyp alynan bu toparyñ sanawyny häzirlikçe okyjylara mälim etmekden saklanýarys. Ony "Nukdaýnazar" bölüminde berilýän gysga makalalara-kolonkalara syn salyp, okyjylaryñ özlerem bilip biler.
Toparyñ agzasy hepdäniñ dowamynda öz saýlap alan günlerinde ýa gününde çykyş eder. Beriljek materiallar dürli temadan bolar, şol sanda okyjylardan gelen teklipler we haýyşlar nazarda tutulybam, dürli temalardan şüweleñli okaljak we ýokary reýting aljak materiallar taýýarlanyp bilner. Taýýarlanjak materiallar bir-iki word sahypadan uzak bolmaz. Şeýle gysga ýazgylar hem-ä internet okyjylaryna okamaga amatly bolar, hemem teswirlerde seslenmeleriñ, bellikleriñ, dürli pikirleriñ gelmegine hyzmat eder. Bu bolsa ilkinji nobatda çykyş edýän bloggerlerimiziñ özüne peýdasy deger.
Meseläniñ saýtda öñden bäri dürli žanrdaky çeper eserleri, makalalary paýlaşyp gelýän awtor-agzalarymyzy az-uçuk gynandyrjak tarapy-da bar:
Saýt açylany bäri biziñ bilen deñ derejede saýta hyzmat eden, eserlerini paýlaşan ýa-da diñe seslenme ýazyp gelen @Bagabat, @Ataýew, @Gumlygelin, @Garaýolly, @Edebiýatçy, @Saparaý, @Sapa, @Şirhan, @Mähriban... ýaly az sanly agzalarymyzdan başgasynyñ tema goýmak mümkinçiligini çäklendireris. Elbetde, olary hem diñe öz eserlerini paýlaşmak şerti bilen awtorlarda galdyrýarys.
Beýtmek belli bir derejede saýtda goýulýan materiallary we gelýän seslenmeleri seýrekletjegini bilýänem bolsak, uzagyndan peýdaly boljagyna ynanýarys. Awtorlarda galdyrylan saýtyñ islendik agzasy öz eserlerini paýlaşyp biler, emma jany sag gezip ýören döwürdeş ýazyjy-şahyrlarymyzyñ (esasanam ýaşlaryñ) eserlerini paýlaşmak çäklendiriler, ýazuw-pozuw bilen meşgullanýan ýaşlarymyzy edebi saýtymyzda görmek ýaly maksadymyzyñ şeýle çäklendirmäniñ diñe bir sebäbidigini bilmegiñizi isleýäris. Awtorlar başgalaryñ eserleri göni özleri paýlaşman, saýtyñ salgysyna ugratmaly bolar, diñe adminstrasiýanyñ gözegçiliginden geçenden soñ makul bilse, adminstratoryñ özi paýlaşar.
Gaçgynymyz birmeñzeşlik - ýurdumyzyñ çäginde hereket edýän saýtlardan alynan materiallary mundan beýläk alynan saýty görkezilenem bolsa, paýlaşmak gadagan ediler. Daşary ýurt saýtlaryndan alynan materiallar hem türkmen diline doly terjime edilen, ýalñyşsyz we alynan ýeri (saýty), awtory goýular. Anonim materiallar duýduryşsyz öçüriler.
Bu agzap geçenlerimiz diñe saýtyñ beýleki bölümleri boýunça. Bu talaplaryñ köpüsi awtorlarymyza öñdenem mälimdir.
Täze "Nukdaýnazar" bölüminde paýlaşyljak materiallar barada aýtmaly bolsa, elbetde, öñki paýlaşylan materiallaryñ we paýlaşyljak çeper eserleriñ bu bölüme we çykyş etjek awtorlara hiç hili dahylly ýeri ýok. Gürrüñ "Nukdaýnazar" barada barýar. Ýañam aýdyşymyz ýaly toparymyzyñ agzasy diñe öz saýlap alan günlerinde ýa gününde çykyş eder. Şol sanda nobatdan daşary hem daşyndan tanymal ýazyjy-şahyrlarymyzyñ, žurnalistlerimiziñ "Nukdaýnazar" üçin ýörite makalalary beriler.
Belli bir sana ýetensoñ, awtorlaryñ çykyşlarynyñ ýygyndysy aýry-aýry pdf kitap görnüşinde saýtyñ kitaphanasynda ýerleşdiriler.
"Nukdaýnazarda" beriljek materiallar gysga, anyk, belli bir pikire ünsi çekip biljek dürli temadaky gysga makalalar bolar. Häzirlikçe talaplarymyz şulardan ybarat. Şeýle-de, okyjylardan geljek dürli teklipleri we seslenmeleri-de göz öñüne tutjakdygymyzy hem bilmegiñizi isleýäris.