Nyşanmy

NYŞANMY

Golaý bardym, göz astyndan synladyň,
Mähir-muhabbetli ýardan nyşanmy?
Uýaljyrap meň mährimi duýmadyň,
Ýaňy biten goşa nardan nyşanmy?

Ýara duşdum — meň ýagdaýym gowlandy,
Ýürek joşdy, telwas urdy, towlandy,
Aý jemalyň gara şala duwlandy,
Nar üstünden inen mardan nyşanmy?

Mysaly sen bulduraýan salkymyň,
Agzyň pisse, dodaklaryň bal kimin,
Ak alkymdan ýara düşýän ýalkymyň,
Tämizje howaly gardan nyşanmy?

Buýsanjy sen meniň ömür-örkümiň,
Namys-aryň guwanjydyr halkymyň,
Diýýän ýaly, eý, ýigitler, galkynyň,
Türkmene bap namys-ardan nyşanmy?

Goçdurdy GARRYÝEW.