(Orazberdi Öwezmyradow, Oraz serdar Dykma Serdaryñ ogly) - Ahal welaýatynyñ Börme obasynda dogulýar. 1881-nji ýylda Aleksandr III-niñ Sankt-Peterburgda türkmen wekiliýetiniñ hormatyna guran kabul edişliginden soñ ýetginjek ýigit Orazberdi Russiýanyñ paýtagtyndaky pažes korpusyna okuwa kabul edilýär. Harby uçilişäni tamamlaýar we Türkmen atly diwiziýasyna ugradylýar.
1914-1917-nji ýyllarda ilki 1-nji, soñra Teke atly polkunyñ 4-nji eskadronyna serkerdelik edýär. Patyşa goşunynyñ polkownigi derejesinde Aşgabada gaýdyp gelýär. 1918-1920-nji ýyllarda aklar'' hereketiniñ tarapynda çykyş edip, general-maýor derejesinde Zakaspi oblastynyñ goşunlarynyñ baş serkerdesi bolýar. 1920-nji ýylda Eýrana gaçyp gitmäge mejbur bolýar. 1922-nji ýylyñ sentýabr aýynda Büjnürt şäherinde aradan çykýar. Köp sanly sylaglara we medallara, şol sanda Keramatly Georgiý ordenine hem mynasyp bolýar.
Öwez GÜNDOGDYÝEW.
''TEKE ATLY POLKUNYÑ SÖWEŞ ÝOLY (1914-1918 ý.)'', 2013.
Birinji jahan urşunda, 1916-njy ýylyň 28-nji maýynda Dnestr derýasynyň günortasyndaky Dobronus söweşi bolup geçýär. Şol söweşde Rus Patyşalygynyň Günorta-Günbatar fronty Awstro-Wengriýa imperiýasynyň ägirt uly goşunlaryny ýeňýär. Ýöne şol söweşde rus goşunlarynyň ýolbaşçylary atly goşunlary dogry ulanyp bilmeýärler. Goşunyň kuwwatly atly korpusy söweşe hiç hili täsirini ýetirmän işsiz galýar. Taýýarlyksyz jeňe ýollanan Teke atly polky uzak Awtro-Wengriýada tas gyrgynçylyga sezewar bolan ekeni. Ýöne jygba-jyg ýagdaýda Teke atly polkunyň 1-nji eskadronynyň serkerdesi, ştab-rotmistr Oraz serdar Dykma serdar ogly (Orazberdi Öwezmyradow) tarapyndan serdarlyk edilen türkmen ýigitleri türkmen ýaragynyň şöhradyny gaçyrmazlygyň hötdesinden gelýärler. Bu söweş baradaky arhiw materiallary şol söweşde Teke atly polkunyň 600 sany hasgurtlarynyň duşmanyň 2000 sany esgerini ýok edendiklerine we 3000-den gowrak awstriýa esgerlerini ýesir alandyklaryna, şonuň ýaly-da köp sanly toplary, okseçerleri (pulemýotlary), tüpeňleri, ok-därileri, atlary we ş.m. harby emläkleri oljalandyklaryna şaýatlyk edýärler. Bu söweş türkmen hasgurtlarynyň söweşjeň taryhyna altyn harplar bilen ýazylandyr.
-1
