Rubagylar

RUBAGYLAR

"Men watançy“ diýmez watan aşygy,
Bile gylyç dakar, dakmaz kaşygy.
Ýene bir zat, selpäp ýörmez köçede
Iliň alabaýy, iliň pişigi.

16.09.206.

***

Adam diýlen seň çakyňdan galadyr,
Sähel gowşak bolsaň, tora saladyr.
Tilsimi köp, biljek bolsaň adamy,
Bir gowy zat, ýalan peçan boladyr.

16-21.09.2016.

***

Hiç kim bilebilmez, geçmez kepili,
Her bendäň öňünden biçik kepini.
Il-beýik, il gara ýere duwlansaň,
Kim bolsaňam saklap, açmaz sepiňi.

20.09.206.

***

Gün-günden basmarlap ýekelik derdim,
Ahyr bir gün ýadap, ýere ýan berdim.
Şo pille perişde bolup geldiň-de,
Ýyly demiň bilen ýene jan berdiň.

21.09.2016.

***

Dünýä giňdir, dünýä geňdir, dünýäni tutan bolmaz,
Dünýä giňdir, dünýä geňdir, dünýäni utan bolmaz.
Doýdumy ýok, doldumy ýok,doýmaz-dolmaz bu dünýä,
Bir gün agyňy aglajak käbäň eneň, ataň ýokdur.

22.09.206.

***

Her kim özüňkini dogry bilýändir,
Özi ogry, ili ogry bilýändir.
Suw içer mal eýesiniň gözünden,
Eýesini, meger, sygry bilýändir.

23.09.206.

***

Tora düşdi, tutdum altyn balygy,
Jem boldy gaşymda dünýäň şalygy.
Munuň düýşde bolanlygam bir gowy,
Hyltym diýip, tas undupdym halygy.

23.09.206.

***

Geň-ow, kim bagtyny zerden gözleýär,
Kimler ony gara derden gözleýär.
Bagtym diýip, harsydünýä kişiler
Ýygnan malyn öz-özüne dözmeýär.

25.09.2016.

***

Ner dogulmyş, asly onuň maýypdandyr,
Diýerler: "Neriň döli bolmazmyş“, haýpdandyr.
Muňa akyl çatmaz hiç, haýranyň galar,
Sorasaňyz diýerler: "Bu gaýypdandyr...“

26-27.10.2016.

***

Bäş barmagyň deň däldir,
Aňňyrsalar heň däldir.
Görenime ýaka tutdum,
Indikisi geň däldir.

29.10.2016.

***

Bir-birege sataşmadyk
Lowlap duran ataşmydyk?
Ýa közmüdik ojakdaky,
Howry entek ýatyşmadyk...

***

Enäniň perzende kasty bolmazmyş,
Melgunyň jahanda rasty bolmazmyş.
Öz ilinde barça zada erk eden
Özi bir soltanyň dosty bolmazmyş.

15.11.2016.

***

Iren ýaly adam biri-birinden,
Gep çekmez bolupdyr sopy pirinden.
Piline söýenip diýdi bir daýhan:
--Bularyň söýesi, möhüri „bi“-den...

13.11.2016.

***

Arpamyşyn bugdaý diýip ekeniň,
Ölmeseň herki zat görjek ekeniň.
Gomparýarsyň il içinde nämäňe?
Işiň düşse, lola gurjak ekeniň...

17.11.2016.

***

Mahal-mahal öwüt berdim inime,
Inim düşünmedi meniň dilime.
Wah, men oňa nädip akyl bereýin,
Sözüme däl, garap dursa elime.

27.11.2016.

***

Ol obanyň begenji ýok hiç zada,
Ýa-da şol obada şeýlemi kada?
Birinden sorasam, diýdi pyşyrdap:
- Ýaşaýar obada bir haramzada...

28.11.2016.

***

Ogrynyň içinden ogry tapyldy,
Oňa jeza bermek dogry tapyldy.
Berjaý etmek üçin agyr jezany
Içinde bir eli egri tapyldy.

29.12.2016.

***

Oz-ozüme gaýym bolup ýaşadym,
Durmuşyma kaýyl bolup ýaşadym.
Ýöne baryp azgyndanam sorasaň,
Diýmez asla: „Haýyn bolup ýaşadym“.

31.12.2016.

***

Almak hakda haçan seni,
Bir gün synlar ajal seni.
Gören barmy, heý, biriniň,
Sypyp ondan gaçanyny?!.

02.01.2017.

***

Täsindir bu tebigatyň owazy,
Jan berer jansyza birdem howasy.
Gije-gündiz, Aý-Gün, parlak ýyldyzlar,
Asman-Zemin... bary munuň güwäsi.

07.01.2017.

***

Golaý durjak bolsamam men,
Golaýlatmadyň meni sen.
Garrap müflisiň çykansoň,
Meni arka tutmagyň geň.

07.01.2017.

***

Olaram oýnady, bizem oýnadyk,
Gyşyna oýnadyk, ýazam oýnadyk.
Hezil zat ekeni oýun diýilýän,
Jüýje sanaşylan güýzem oýnadyk...

21.01.2017.

***

Köp dert galmyş şirin janda, bu tende,
"Dertlerim dep boldy“ diýmez hiç bende.
Kim gözden, kim dilden, kimler ýürekden...
Derdiň asany ýok, barysy gende.

***

Gardaş bilen gardaş dilbagly ermiş,
Gäbiňi azdyran bir şeýtan ermiş.
Birisi Şiraly, biri Gulaly,
Birisi-hä körmüş, birisem kermiş.

***

Niçe ýaşasaň-da ahyr ötmeli,
Bilbilgöýe dana, şahyr ötmeli.
Zöhre diýip kebelek deý perwana
Barybir, barybir Tahyr ötmeli...

28.01.2017.

***

Tüýkürerler ajy bolsaň,
Ýuwudarlar süýji bolsaň.
Näme diýip, näme goýjak,
Ogurlykdan hajy bolsaň.

17.02.2017.

***

Çopan goýsaňyz çolagy,
Budur möjekler dilegi.
- Suw goýbermez- diýmäň hernä,
Takyr goýsaňyz çelegi.

28.02.2017.

***

Durmuş akyp barýan derýa—diýdiler,
Çyrpynyp kenara urýar—diýdiler.
Möýüň kerebine meňzeýänler bar,
Çolaşsaň işiňi görýär- diýdiler.

02.03.2017.

***

Oba-gyşlagyňy tozdurýan şolar,
"Ýüwrük“ diýip, çaman ozdurýan şolar.
"Şolaryň“ kimligin bilýän-le weli,
Gepleseň biliňi ýazdyrýan şolar.

03.03.2017.

***

Eý, Alla, eý, Alla, eý, Alla, Alla,
Galpa tagzym kylmak boldy hyllalla.
Neşekeşi näletleýär münberden
Neşekeşiň biri perişde ylla...

04.03.2017.

***

Haýpym gelýär keýpin bilmeýänlere,
Haýpym gelýär aýbyn bilmeýänlere.
Bir-birege haýpyň gelmeli wagty,
Haýpym gelýär haýpy gelmeýänlere.

04.03.2017.

***

Enemiň aýdany çyn boldy gerek,
Ýarym çynam bolsa, diýmedim „telek“.
- Bolmarsyň-diýipdi- sen ketde başlyk,
Enemiň sözüni eşitmiş pelek...

11-12.03.2017.

***

"Durmuşda sarpaly-diýip-edaly“,
Gowşurdylar oňa uly medaly.
Ýöne bir zadyny aýtsam onuň,
Öz gününe öň goýmandy hudany.

***

Çapmandym hiç haçan haýyrma, Hudaý.
Elimden, aýakdan... aýyrma, Hudaý,
Aç goýsaň goý ajy görerim ýaly,
Dilegim—gerk-gäbe doýurma, Hudaý!..

27.03.2017.

***

Atamyň dostuna menem ýat bolman,
Duşmanyndan sapak alsam, dost bolman.
Gulagyňa guýup durkam , han ogul,
Nämeden-how, bir kümsüge dost bolmaň?!

03.05.2017.

***

Jöwzalarda gyzgyn, ýele bakmady,
Aňzakda apalap, ýyly saklady.
Ýigit ösdi suwda biten ak derek,
Garranda atasyn öli saklady.

15.05.2017.

***

Sany-sajagy ýok bilermenleriň,
Sany-sajagy ýok gülermenleriň.
Ýöne weli hataryny az gördüm,
Gysym toprak üçin ölermenleriň.

16.05.2017.