TÜRKMENIÑ AHWALY
Ýandakdan pes dagdan belent,
Boldy türkmeniň ahwaly.
Aýak astynda oba-kent,
Öldi türkmeniň düyp ýoly.
Eý ýumrulmyş köne dünýä,
Kimler saňa boldy eýe,
Geçen günüm diýe-diýe,
Aglamak türkmeniň haly.
Bir sallançak dokuz oglan,
Mündi, düşdi, geçdi döwran,
Köne dünýä soňy weýran,
Çyna meňzär mekri-aly.
Kyrk şäherden hyraç aldy,
Oguz ili äleme doldy,
Çoh döwran geldi, sowuldy,
Hany onuň däbi-ýoly.
Körhan ogly Ugurjyk alp,
Gyrdy türk ilin at salyp,
Görogly oňa at galyp,
Paç alyp geçdi sag-soly.
Doglup ikinji Ugurjyk,
Ýada satylandyr birçak,
Döwran dolanýandyr her çak,
Düzlener türkmeniň haly.
Gel, Şeydaýy, köňlüň alda,
Ýalan söz çykyp her dilde,
Her bela bolsa görelde,
Bulandyrdy biziň ili.
ŞEÝDAÝY.
