Toba kylmasdan burun

TOBA KYLMASDAN BURUN

Akyl erseñ eý byradar ýygla, gülmesden burun,
Sal özüñni dogry ýolga, toba kylmasdan burun.

Geç bu kesbi-käriden, çyk bu jahan bazarydan,
Derdiñiñ dermanyn al, dellal bilmezden burun.

Wehmi-usýan birle bol, pikr et, puşeýman birle bol,
Tañla binafyg nedamet wagty gelmesden burun.

Bir mynasyp ýer seni, bagryga basyp iýr seni,
Iý gamyñny, ýer bile ýegsan bolmasdan burun.

Ur nedem daşyga baş, aksyn gözünden doly ýaş,
Derdi-hasrat birle ýer topraga dolmasdan burun.

Geldi çün wagty-hazan, pikriñ nedir, eý bagyban,
Ne ýatyr sen, ýyg bu gülzaryñny solmasdan burun.

Bilmenem Şeýdaýy sen, ýa biakyl sähraýy sen,
Akyl erseñ, sen özüñni öldür ölmesden burun.