"Wah, şeýlemidi..." / ýumoreska

"WAH, ŞEÝLEMIDI..."

Baýra dyrmaşyp ugran gölegçileriñ Oraz ikimizem orta gürpünden barýardyk. Şol pursatda bölüm müdirimiz misli gökden düşen ýaly gapdalymyzda häzir boldy. Ol:
- Näme, iliñ yzynda aýagyñyzy süýreşip gelýäñiz, kömek etmeli ahyry - diýdi-de, ýüzümize hyrsyz garap, öñe okdurylyp gitdi. Badyna-da tabydyñ bir tarapyny göterip barýan deşli ýigidiñ eline ýapyşdy.
Ýapy ýokary ýol, agyr tabyt labyr atyp, müdiriñ çepiksije göwresini ýegşerdýärdi, çaýşanaklaýan aýaklary bu zähmetiñ oña juda agyr degýänini has-da äşgär görkezýärdi.
Öz medicine dözmedimi ýa-da merhumyñ öñündäki iñ soñky adamkärçilik borjuny berjaý etmekçi boldymy, garaz. Oraz öñden barýanlaryñ yzyndan ýetdi-de:
- Ora Sapaýewiç, indi gezegi maña beräýiñ! - diýip, müdire ýüzlendi.
Ora Sapaýewiç ýegşerip barşyna tutuk sesi bilen:
- Özüm... - diýdi.
Şondan soñ Oraz yzdakylaryñ birini çalşyp, soñ gezegi ýene birine berdi-de, meniñ bilen gapdallaşyp, ýöräp başlady.
- Bu neneñsi geñ hadysa boldy-how. Ora Sapaýewiç beýle ýagdaýda öz ilen-çalanlaryna-da "ýüregim bolanok" bahanasy bilen görünýän jemende däldi-le? - diýip, Oraz geñirgendi.
- Şuña menem haýran?!
Merhum jaýlanýarka-da Ora Sapaýewiç ähli işe özi ýetjek bolup pelesañ urýardy, şol bir wagtda hem assyrynlyk bilen töweregine garanjaklaýardy. Ol ahyry nämüçindir ynjalman, ýene ýanymyza geldi-de:
- Näme üçin Geldi Meredowiçiñ özi görnenokka? - diýdi.
- Ol haýsy Geldi Meredowiç?
Orazyñ garşylyklaýyn beren sowalyna müdiriñ girre gaharynyñ gelendigini hyrsyz jiñkerýän gözjagazlar habar berýärdiler.
- Näme, indi direktoryñ adynam unudaýdyñmy?
- Weý, ol bu ýere nädip gelsin, onuñ öz gaýyn atasy aradan çykypdyr-a - diýip, men Oraza Derek jogap berdim.
- Ä, bu kim?..
- Bu bir wagt edaramyzda garawulçylyk edip, şondan pensiýä giden Mele aga, bende...
Men sözümi tamamlamankam...
- Wah, şeýlemidi, asyl - diýip, ol ahmyr bilen başyny ýaýkady-da, hasanaklap, märekeden saýlandy.

Gurbanmuhammet REJEBOW.

"Edebiýat we sungat" gazeti, 1986.