Arkasyna şiriñ suratyny çekdiren kazwinli hakynda hekaýat

Arkasyna Şiriñ suratyny çekdiren kazwinli hakynda hekaýat

Kazwin şäherinde kä kişileriñ
Edýän işlerine bir üns beriñ.

Näme düwýär o bendeler göwnüne,
Käsi arkasyna, käsi egnine

Çekdirip Şiriñ ýa Barsyñ şekilni,
Saýýarlar özlerni ilden akylly.

Bir gün şolar ýaly kazwinliñ biri
Ilden saýlanmagyñ bolup ýesiri,

Barypdyr-da hammamçynyñ ýanyna,
Diýipdir gabarlyp, sygman donuna:

"Senden haýyşym şu: Görkez-de zoruñ,
Çekip ber arkama suratyn Şiriñ.

Gaýgyrma, gadyrdan, eliñde baryñ,
Bezese arkamy suraty Şiriñ,

Şir ýaly duýaryn özümi men-de,
Geñ galyp seretsin her kim görende.

Hut Şiriñ kuwwaty goşulan deýin,
Ähli ýerde döşüm açyp gezeýin".

Suratkeş hammamçy çykarman sesin,
Onuñ arkasyna nançdy iññesin.

Kazwinli tisginip, sorady ondan:
"Wäk how, näme, aryñ köýdümi mende?"

"Ne beýle şerraýlap turuzýañ gopgun?
men ýañy birinji iññämi sokdum".

"Şiriñ nirni ilki çekäýsem diýýäñ?"
"Guýruk tarapyndan başladym eýýäm".

"Çydar ýaly däl how, sokýan iññäñe,
Şo Şiri guýruksyz çekeñde näme?"

Öz işinde edişi deý hemişe,
Hammamçy ýene-de başlady işe.

"Indi nämesini çekýärsiñ Şiriñ?"
"Häzir-ä gulagna güýmenip durun".

"Iññäñ sanjylyşy göýä bir ajal,
Gulaksyz bolanda, bolmaýarmy şol?"

Hammamçy ýene-de iññäni sokdy,
Kazwinliñ agzyndan ah-perýat çykdy:

"Indi nämesini çekýärsiñ onuñ,
Iññeleñ janymy aldy-la meniñ?"

"Men Şiriñ garnyny çekýän. Hä näme?"
"Çydar ýaly däl how, halys iññäñe.

Agyrydan ýaña üýtgedi tüýsüm,
Owarra et, garny başyny iýsin!"

"Akmagyñ akmagy, pekgäniñ biri,
Sen nirde gördüñ garynsyz Şiri?
Hiç kimiñ kem ýerem, artyk ýerem ýok,
Dünýe döräp, beýle zady gören ýok.

Isle, hä isleme - şoñ üçin senem
Çydamly borsuñ uwlap, ölseñem!"

Boş hyýaly ýüregiñde besleseñ,
Şeýdip, ilden saýlanmagy isleseñ,

Her hili ejire dözmeli borsuñ,
Ýa-da öz ugruña gezmeli borsuñ.

Göwün bermän howaýy ham-hyýala,
Kimler düşen bolsa arassa ýola,

Eşret görer, mydam niýetiñ, päliñ
Oñatlyga dikip, dowam et ýoluñ.

Bilip goý, islendik tekepbirligiñ
Añyrsynda muşakgatyñ barlygyn.