Bu dünýäniñ gözüne gan öýlüpdir...

* * *

Bu dünýäniñ gözüne gan öýlüpdir,
Men gaýdamsoñ, asman zaryn aglady.
Bir akmag-a oña ýagyş diýipdir,
Bir ýalançam gözýaş diýip, aldady.

Ol adamzat hesretiniñ belendi,
Şabyrdaýyp giden, sygman kagyza.
Gözýaş bolsa - ol ejizlik bolardy,
Ýagyş bolsa - ýönekeý bir hadysa.

Ol asmanyñ ýer tapmadyk yhlasy,
Syrdaş gözläp, penjiräni kakdy ol.
Nirelerden ol delalat isledi,
Ýeñlemedi, gussa bolup akdy ol.

Jaýlañ üçeginden özün taşlady,
Ýúzûn urdy tikenekli baglara.
Bir pursatlyk dolduransoñ boşlugy,
Galdy boşap peşeñ deýin, bugaryp.

Hanha, öz ugruna gitdi süýrenip,
Köçelerden, endam-jany ýaraly.
Kimler oña durdy biraz güýmenip,
Kimler onuñ synasyndan ýöredi.

Tebigatyñ emri şeýle, ýok karar,
Özüñ aglap, ýene özüñ diñmeli.
Ýöne ýakynlaññam bir kadasy bar ~
Dynman ýagsa, döredýärler jeññeli.

* * *

Biraz dem dürsedim argynly ýoldan,
Şemala ses eden baga söýenip.
Diñe şu pursatda men görüp galdym,
Aýagyma bitaý köwüş geýenim.

Oýlanman ekenim men özüm hakda,
Asyl şunda eken utanýan ýerim!
Durmuş durşy bilen tomaşa-sahna
(Kesip bolýan bolsa utulýan ýeriñ).

Ömür diýlen zadam uzak däl eken ~
Bir başa çekemde, içip gutardym.
Täk ömür däl, düzgünlerin halasam,
Islendik oýunda hökman utardym.

Durmuş diýilen zat oýun däl eken,
Şoñ üçin ýok belli-külli düzgüni.
Bar arzuwyñ köplükdedi häli oñ
Indi welin, küýseýärsiñ düzlügi.

Duýdum, wagt geçenok, özümiz geçýäs,
Bize çyndan gol bulanlañ deñinden.
Ýaza däl-de, biz gyşlara garaşýas,
Solmak üçin olañ sowuk deminden.

Dertler gider öýdýäs bu ýyllar bilen,
Bahara garaşýas tomusa deñiç.
Gyşlar geçdi ýyly geýimler bilen,
Kalbymyzdaky gyş geçenok heniz.

Öñi-ardy görünmeýän bu ýolda,
Duşan dertlem çökderräkdi meñkiden.
Biz gülleri saýgarýarys hyýalda,
Garañkyda bar gülleriñ reñki deñ.

Şeýdip durmuş kowýar bizi çar ýana,
Öz islegne görä, keýpine görä.
Hanjar berer gursagyñy ýarmaga,
Ýöne ýar beräýmez söýşüñe görä.

Ýazylmaly zatlar ýazylman galar,
Ýaşalmaly günler ýaşarlar, dogman.
Ýogsa, nädip Durmuş adyn gazanar -
Tapyp-ýitirilmän, güllemän-solman!

...Bitaý köwüşlerde bir menzil geçdim,
Beter gümra boldum öz aýdymyma.
Men ykbalym bilen şeýle meñzeşdim -
Saýgar ýalam däldi bitaýlygymy.

Döwlet ORAZSÄHEDOW.