Nädip Nobel baýragyna mynasyp bolmaly? / ýumoreska

NÄDIP NOBEL BAÝRAGYNA MYNASYP BOLMALY?

Esasy şerti az uklamaly.
Ömrüň üçden bir böleginiň ukuda geçýändigini ýatlalyň.
Iki oýnam, ýagny sekiz sagat uky-da, lezzetlidir öz-ä!
Ýöne Nobel baýragam kemje-kerdem däl bolsa gerek!
Ukymy ýa baýrak, birini saýla!
Napoleon Bonopart ukuçyl adam däl eken.
Ol bu babatda tüýs Nobel baýragyna mynasyp serkerde bolupdyr. Ýöne ikisiniň döwri gabat gelenok-da. Napoleon 1769-1821-nji ýyllarda ýaşan serkerde. Nobel baýragy bolsa 1901-nji ýylda döredildi.
«Erkek kişä dört, zenan adama bäş, tentege alty sagat uky gerek» diýip, Napoleon Bonopart ýeser aýdypdyr.
Ýöne Ýer togalagynyň iň uly baýragyna mynasyp bolmak üçin bu-da ýeterlik däl oguşýa.
Ukusyna juda saklygy boýunça amerikalylaryň göz monjugy hasap edilýän Tomas Alwa Edison (1847-1931) gije-gündiziň dowamynda bary-ýogy ikije sagat uklapdyr. Gülkiň tutýandyr. Sebäbi biziň ojagaz uka uky diýmäge-de dilimiz barmaz. Irkilmek, ymyzganmak, gözüň awusyny almak diýsek has dogry bolardy. Emma Edison görgülem Nobel baýragyna mynasyp boljak bolup, baý, jan edipdir-ä.
Edison şeýle bir söz aýdypdyr:
«Diňe üstünlige garaşýarka-da dek oturmaýan adam ýeňşe ýetip biler».
Mamla gep, dogry gürrüň.
Biri Allatagaladan «Žiguli» diläpdir: «Eý Alla jan, men pyýada, «Žiguli» ber-dä!».
«Bolýar, bendäm, beräýerin».
Esli wagt geçýär welin, berilýän maşyn ýok. Teplowoz uzyn-uzyn sostawlary çekip barýar. Üstünde-de gat-gat «Žiguli»...
«Eý Alla, maşyn bereňok-la?».
«Bendäm, hereket et ahbeti, maňa-da bir delil gereg-ä. Iň bolmanda ýekeje lotereý biledini bir al ahyry».
Umuman, Nobel baýragyny almak üçin ilki sallançakdakaň, soň gorşoklykaň oýnagyň kitap bolmaly-da. Şony ýyrt weli, gazet-žurnallardan daşda bolma-da, garaz. Orta mekdepdekäň seni okadýan mugallymlardan göwnüň suw içmedimi, goňşy obanyň mekdebine gatna. Eneňe-ataňa diý: goý, okuwdan soň seniň üçin ýörite bir mugallymy kesanasyna tutsyn. Puluňyz ýetmese gapysynda talaban duraý.
Goşun gullugynda bolaňda salam hatyny özüň ýaz.
Ýokary okuw jaýyna girjek bolanyňda, ene-ataňa azar berme. Olar seniň haýsy okuwa girýänligiňem bilmesinler. Emip oturan sygrynam satdyrma. ÝOJ-yň mugalymlaryny eklemek talybyň maňlaýyna ýazylmandyr.
Haýsy ÝOJ-yň mugallymlary adyl we sowatly bolsa şony seçip al.
Aglaba talyp umumy ýaşaýyş jaýynda däl-de, umumy wagonda ýatyp öýüne zygyr-zygyr gatnaýar. Beýtseň hiçem baýrak almarsyň. Bu gün ýa ertir Nobel baýragyna mynasyp boljaklara uý, şolary özüňe halypa tutun. Nobeliň gitjek ýeri ýok.

Gurbangylyç HYDYROW.

«Talyp durmuşy» gazeti, 03.04.1992 ý.