Puşkiniñ monology

PUŞKINIÑ MONOLOGY

I.

Terjimeçilerim,
Salawmaleýkim!
Meniñ adym Puşkin,
Bilemok siz kim?
"Öldürildi şahyr ~
Namys ýesiri"
Diýseler-de heniz,
Ölemok - diri.

Dünýäde ýaşasa,
Ýekeje şahyr,
Men entek-entekler
Ölmerin ahyr!

II.

Men namys ýesiri,
Siz pul ýesiri.
Öldürjek bolýañyz ~
Men bolsa diri!
Meniñ öz öýüm bar,
Hem-de öz sesim.
Ýoýmaga haky ýok
Ony hiç kesiñ!

III.

Betgelşigem bolsa
Öñki durşum bes.
Siz Puşkini ~ Musin
Edipsiñiz tas.
Bu neneñ ryswalyk,
Hem bihaýalyk,
Näme diýer muny
Gören halaýyk?
Ykbalymy size
Ynanan gör kim?
Men buýsançly Puşkin,
Bilemok siz kim?

IV.

Men çydap bilmerin
Hiç beýle hala.
Häziriñ özünde
Çykyñ duele!
Sebäbi, şeýtmäge
Bar meniñ hakym.
Men ~ buýra saç Puşkin,
Çýort bilsin, siz kim?..

Berdinazar HUDAÝNAZAROW,
Türkmenistanyñ Halk ýazyjysy.