Duşdum

DUŞDUM

Syrym aýtsam, dost-dogan, il,
Öňki söýen, ýara duşdum.
Ýazgyn maňlaý, dodagy gül,
Alkymy ak gara duşdum.

Görenler owadanlygyn,
Inkär eder «adamlygyn»,
Lezzetinden dadanlygym,
Alma ýaňak, nara duşdum.

Hüýr görküniň biri saçdyr,
Alçak göwni uçar guşdur.
Gyz edebi, akyl-huşdur,
Wepa jähtde, ara duşdum.

Taryhda ýokdur döreýşi,
Müň gyza deger ýöreýşi,
Inçe bili – dutar kirşi,
Hiňlendirýän tara duşdum.

Gülen wagty süzüp gözün,
Ap-ak dişler bildir özün,
Öwürende aý dek ýüzün,
Tümlükde mydara duşdum.

Goşar küýsetmez bilezik,
Barmak bezär tylla ýüzük,
Bir eýýämden tamam üzük,
Indi, umydara duşdum.

Dolmaç akdyr, injik topuk,
Ýaka çenli syna ýapyk,
Ýapy-ýumry, çigin-çapyk,
Ýyly tenli, gora duşdum.

Ençe ýyldyr, ýar gideni,
Oda atyp, munda meni,
Bir öldürip, bar edeni,
Direlden, gandara duşdum.

Kyrkdan agdy meniň ýaşym,
Köp külpeti gördi başym,
Geňläbersin degre-daşym,
Döwran dönse, «bora» duşdum.

Ýylgyrjaklap ýakynlaşdy,
Başyn atyp salamlaşdy,
Ýakyn ara ýürek joşdy,
Ömür boýy, zara duşdum.

Umytlarym sowrup ýele,
Kellämde ala zenzele,
Biz bir meýdan durduk bile,
Ýiten ady-sora duşdum.

Kim-kimden göwni galypdyr,
Ýaşlygym ýada salyp dur,
Görsene, ene bolupdyr,
Ah, kinesi bara duşdum.

Dikanlap bakdy ýüzüme,
Zordan erk etdim özüme,
Hal-ahwal soran sözüme,
Gadry gaçan «hara» duşdum.

Ine-gana oturaly,
Baryn seljerip göreli,
Diýdim: «Gel, pynhan ýöreli»,
Dili duzly, şora duşdum.

Diýdi: «Saňa haýran, men-ä,
Bir niýetiň bar eken-ä?!»,
(Eýsem biz ýekme-ýek nä?!)
Diýdim: «Men, näziň çeken-ä»,
Ýürek intizara duşdum.

Hyjuwlarma tap getirmän,
Golun tutdum wagt ýitirmän.
Soňuna akyl ýetirmän,
Barysy owarra duşdum.

Gysmyljyrap, gujak ýaýdy,
Gursagyma başyn goýdy,
Mähriban ol, meni çoýdy,
Heser-howandara, duşdum.

Ýüz-gözünden posa aldym,
Inçe bile golum saldym,
«Uçmaha» düşüp aýňaldym,
Diýdi: Illim..., zora duşdum.