Biläýsem

BILÄÝSEM

Ýürek seni küýsär, gözlerim görmez,
Wagt tapyp, ýanyňa baryp biläýsem.
Aýralyk aýgytly, ynjalyk bermez,
Her günde, didaryň görüp biläýsem.

Yzgytsyz yzasyň, köňlüme meniň,
Rahatlan, ynjy ýok, göwnüňe seniň,
Mähriban, görke baý, näzik bedeniň,
Garşylap, gujagym gerip biläýsem.

Heý, rehim etmezmiň, galdym delmurup,
Şunça özelenip, şonça ýalbaryp,
Aý yşgyna ýola düşsem, men baryp,
Ýüregimi sowgat berip biläýsem.

Geýinşiň gelşikli, laýyk, görkana,
Mazamlanmaz, güjeňlenmez erkana,
«Örüklengi» özüm çekip bir ýana,
Otdan çykyp, suwa urup biläýsem.

Ýakymyň ýaňzydýan, ýalkymyň ýaýsaň,
Gözleň gülüşinde, ýüze nur çaýsaň,
Hopugyp, howlugýan howandar saýsaň,
Hal-ahwalyň sorap durup biläýsem.

Saldamly söz sende, salyhat sende,
Kararsyz men munda, kanahat sende,
Aşygyň görgüli – birahat bende,
Daň säher törüňden örüp biläýsem.

Gözleýän alajyn, aňymdan aňtap,
It boldum, ugruňda ser-sepil entäp,
Ýörejek ýodaňdan gapdalyň ýantap,
Deň nepesde, bile aryp biläýsem.

Senden seda gelmez, çykmaz ses-üýnüň,
Ertirki umytda bu günüm, düýnüm,
Hakdan seni diläp, hiç ýokdur müýnüm,
Maňlaýymda, daşy ýaryp biläýsem.

Illi diýr, irkilsem tisginip turýan,
Göýä, zerur zatdan, giç galyp barýan,
Gaýgyrman, bagyşlap janymy berýän,
Ömrümi ömrüňe garyp biläýsem.