Garaşýan

GARAŞÝAN

Kümüşsow igdeler bürendi güle,
Şokolad ysyndan gandy ýürekler.
Seniň geleriňe dabara bile
Fontan ýaly çüwdürlip dur derekler.

Gyzgalaňly,
gozgalaňly garaşmak
Bireýýäm suw etdi sabyr-takady.
Çybynlaram dünýäň ähli giňligin,
Hem il-günüň peşehana gabady.

Diňe aşyklara galdy bu gije,
Aşyklara galdy gije, gül ýüzüm.
Seret, asmany däl,
aşyk ýüregmi
Çyzyp otlap gitdi süýnen ýyldyzym.

Seniň daban sesiňdir diýp aldanýar
Öz-özüniň gürsüldisne ýüregim.
Wah, meniň ýanşyma dabara bile
Fontan ýaly çuwdürlip dur deregim...

Nobatguly REJEBOW

Çeşme:br.com.tm