Gül ýüzüňde gam görmäýin!

GÜL ÝÜZÜŇDE GAM GÖRMÄÝIN!

Durmuş kä giň, käte gedem,
Biler onuň ýolun geçen.
Ýylgyrsana, käbäm ejem,
Gül ýüzüňde gam görmäýin!

Çykyp muhabbet baýryňa,
Bilmen arzuwdan aýryla.
Hemme zat bolar haýryna,
Gözleriňde gam görmäýin!

Köňlüm ýuwar çygsyz ýagyş,
Etsem-de, hatasyz ýalňyş,
Günler geçer,geler ýaz-gyş,
Gül ýüzüňde gam görmäýin!

Kalba şatlyk donun geý sen,
Ýykar gaýgy-gussa eýsem.
Gelinmez ýere gidäýsem,
Gözleriňde gam görmäýin!

Tukatlansaň, göwni baýym
Ne beýle sowuk-la jaýym.
Mähribanym, ejem janym,
Gül ýüzüňde gam görmäýin!

Nury SAKÇYÝEW