Hat

Ýürekden çykandyr - bir gün ýürek bor,
Iň mukaddes duýgy bolýandyr hatda.
Ezizim, sen meniň hatymy sakla, -
Bagtly günde, bagtsyz günde gerek bor.

Bagtyň özi ýa-da ekiz taýydyr,
Goý, bolsun bäş petde, bolsun on petde,
Ezizim, sen meniň hatymy sakla, -
Zeminiň görküdir, gögüň Aýydyr.

Adamzada aýtmadyk sözlerim,
Syrlarym, barysy saklanýar gatda.
Ezizim, sen meniň hatymy sakla, -
Gökden diläp, ýerden gözlän gözlegim.

Ýyrtylyp, sürtülip zaýa bolmasyn,
Epinlerin ýazyp, bir ýüpe çat-da,
Ezizim, sen meniň hatymy sakla, -
Başga adam bilmesin, hiç bilmesin.

Üýtgetsemem bolşumy ýa dinimi,
Özümi oda ýak, ýa suwa okla.
Ezizim, sen meniň hatymy sakla,
Ertirki günlerem aýa düýnümi.