Haýp, Ukrainanyñ Ukraina edeni

HAÝP, UKRAINANYÑ UKRAINA EDENI

Añyrsyndaky uly ekrany türk baýdagynyñ suraty tutup dur, göýä türk jemendesi janlandyrylýar, tansçynyñ eşigini geýen alasamsygyñ ýalañaç göbegini ogşap, onuñ bilen deñ pahlawamyzy, böregimizi, kebabymyzy, nargilämizi (kalýan, suw çilimi), aýdymlarymyzy, "Asyryñ lideriniñ" murtuny ýañsylaýar, kellesinde-de seçekli feska bar... Bu adam häzir Ukrainanyñ Prezidenti.
Wäşi artist.
Öñler "Komediýa kluby" ady bilen sahna şowlarynda çykyş edýärdi.
2015-nji ýylda teleýaýlyma geçdi.
Hem özüniñ, hem ýurdunyñ ykbaly özgerdi.
"Halkyñ hyzmatkäri" atly teleserialda baş rolda oýnady.
Serialda syýasata dahylly ýeri ýokka, tötänlikden döwlet ýolbaşçylygyna saýlanan namysjañ taryh mugallymynyñ obrazyny janlandyrýardy.
Serialyñ gahrymany porsusy çykan syýasatçylara baş galdyrýan, korrupsiýa we parahorluga garşy göreşýän, parahorlary paş edýän, häkimiýete ýallakçylyk edýän metbugat serişdeleriniñ üstünden gülýän, isripçilikden gaçýan, gulluk awtoulagyna hem münmeýän, welosipedli gezýän, ýanynda goragçysy hem bolmadyk "halkyñ ýolbaşçysynyñ" obrazydy.
Serial iñ köp tomaşa edilýän gepleşikler boýunça rekord täzeledi: Ukrainanyñ ilaty 40 million bolsa, serialyñ her bölümine 20 million adam tomaşa edýärdi.
Serialyñ şeýle uly gyzyklanma eýe bolmagy ýönelige däldi. Çünki... Ukraina hakykatdanam porsusy çykan syýasatçylar tarapyndan göýä ýesir alnan ýalydy, ýurt bokurdagyna çenli korrupsiýa batypdy, "Halkyñ hyzmatkäri" serialy halkyñ oý-pikirlerine terjimeçilik edýärdi.
Senariýa hut damardan basylyp ýazylypdy!
2018-nji ýyl...
"Halkyñ hyzmatkäri" ady bilen partiýa guruldy.
Partiýanyñ resmi gurulyş arzasyny "Halkyñ hyzmatkäri" serialynyñ önümçilik şereketi beripdi, önümçilik şereketiniñ direktory "Halkyñ hyzmatkäri" partiýasynyñ başlygy ýaly bolup görünýärdi.
"Nämüçin beýtdiñiz?" diýip soradylar.
Wäşi artist düşündirdi...
- Biziñ teleserialymyzyñ adyny başgalary syýasy maksatlar üçin ogurlaýmasyn diýip şeýtdik, serialymyz bilen adybir partiýa gurup, saýlawçylarymyzy ýalñyşdyryp bilerler, käbir köpbilmişler 2017-nji ýylda şeýle synanşyga baş goşupdylar, serialymyzyñ adyny goramak üçin eden zadymyz - diýdi.
Bu düşündiriş makul görüldi. Hiç kim ýadyrgamady.
2019-njy ýylyñ Täze ýyl agşamy...
Sagadyñ dili 24:00-y görkezende Ukrainanyñ ähli teleýaýlymlary Prezident Poroşenkonyñ däp bolup gelýän Täze ýyl gutlagyny efire bermelidi.
Ähli teleýaýlymlar çykyşy berdiler. Birinden başgasy!
"Halkyñ hyzmatkäri" serialynyñ berlen "1+1" teleýaýlymy sagadyñ dili 24:00-y görkezende wäşi artistiñ çykyşyny berdi.
Wäşi artist "hakykatdanam" Prezidentlige talaşgärdigini mälim etdi!
"1+1" teleýaýlymynyñ eýesi Ukrainanyñ iñ garañky oligarhlaryndan Igor Kolomoýskidi.
Ol bank, nebit-gaz, magdan, howa ýollary, metbugat ýaly birgiden pudaklarda şereketi bardy.
Ukrainanyñ raýatlygy bilen birlikde Ysraýyl we Kipr Rum respublikasy ýaly ýurtlardanam raýatlygy bardy. Kolomoýskiý imperatorlygyny Şweýsariýada oturan ýerinden dolandyrýardy, özi Ysraýylda we ABŞ-da ýaşaýardy.
Aýratyn güýçlerden (спецназ) özüne gulluk etmek üçin saýlap alan ýaragly, ýüzi nikaply ýörite birlikleriniñ bardygyny, bäsdeşleriniñ üstüne çozuşlary gurnaýandygyny, birnäçe jenaýatlarda adynyñ geçýändigini bilmeýän ýokdy.
Myhmanlaryna göz görkezmek üçin ofisindäki mähnet akwariumda akula saklaýardy.
Döwletiñ bäş milliard dollaryny iýendigi üçin Ukrainadaky hususy bankyny döwlet konfiskowat edipdi.
"Pyrtykal rewolýusiýany" amala aşyran kadrlaryñ hemaýatkäridi. Ýuşşenko, Timoşenko ýaly syýasatçylaryñ maliýe goldawçysydy.
Kuklalaryñ ýüpüni elinde saklaýan kuklaçydy.
Şindi-de wäşi artistiñ hemaýatkärligini edýärdi. Ol wäşiniñ saýlaw kampaniýalaryna guramaçylyk edýärdi. Logistikasyny, howpsuzlygyny üpjün edýärdi, şahsy aklawjylyk işini wäşiniñ hukuk geñeşçisi alyp barýardy.
Geñ-tañsylyklar gutaranokdy... Güzeranyny mawy ekranyñ üstünden aýlaýan, teleýaýlymlar arkaly döwlet ýolbaşçylygyna talaşgärligini görkezen wäşi telegepleşiklere çykanokdy, ol saýlaw kampaniýasy geçýänçä teleýaýlymlardan gaça durdy.
Hatda Kiýewiñ "Olimpiýa" stadionynda bäsdeşi Poroşenko bilen telegepleşik çekişmesi gurnaldy, ýetmiş müñ tomaşaçy geldi, tribunalar doldy, teleýaýlymlar göni ýaýlymda işe başlady, şonda-da wäşi gelmedi.
Yzly-yzyna telewizion mahabatlary berilýärdi, yzly-yzyna sosial mediýa mahabatlary berilýärdi, köçelere bildirişler asylýardy, emma ol bäsdeşleri bilen birem ýüzbe-ýüz gelenokdy, bir adamlyk şowhun turuzýardy.
Hasam täsini... Saýlaw kampaniýasy geçýänçä ýekeje-de interwýu bermedi, ýeke gezek habar beriş serişdeleriniñ ýygnanşygyny geçirmedi, žurnalistler oña ýeke sowal hem berip bilmediler. Bir özi gürledi oturdy.
Şeýle monolog tilsimi arkaly adamlaryñ añynda hemişe şol serialdaky ýolbaşçynyñ obrazynda galdy, makiýažyny hiç bozmady.
Ahyrynda hyýallar hakykata öwrüldi, teleserial hakykat boldy.
Ol ukrain halkynyñ 74% ses bermeginde döwlet ýolbaşçylygyna saýlandy.
Şondan üç aý öñinçä komiki serialda döwlet ýolbaşçysynyñ obrazyndady.
Şondan üç aý öñinçä teleserialdaky rotunda başga dynnym ýaly syýasy tejribesi ýokdy, parlamentiñ ýa-da haýsydyr bir partiýanyñ öñündenem geçmändi.
Bary-ýogy üç aýda hakykatdanam döwlet ýolbaşçysy wezipesine oturdyldy.
Wäşi artist 1978-nji ýylda doglan, kyrk dört ýaşynda.
Putin 1978-nji ýylda bu artist doglanda КГБ-niñ jansyzy bolup Germaniýada işläp ýördi, wäşiniñ häzirki ýaşynda ol КГБ-niñ binýadynda döredilen kontrrazwedka gullugy ФСБ-niñ başlygydy.
Serial komediýa hökmünde gowy garşylananam bolsa, demokratiýa taýdan alanda, mynasyplyk taýdan alanda "nusga alarlyk serialdy" aslynda.
Haýp, ukrain halkynyñ Ukraina edeni.

Ýylmaz ÖZDIL.

"SÖZCÜ" gazeti, 26.02.2022 ý.